162-ე საჯარო სკოლის დირექტორ სოფო ფანცულაიას განცხადებით, განათლების სამინისტრომ გააფრთხილა, რომ პირველ ექსპერიმენტულ სკოლასთან გაფორმებული მემორანდუმის შესახებ არ გაეხმაურებინა. ის მიიჩნევს, რომ პედაგოგებისა და მშობლების მოთხოვნა სამართლიანია და მზადყოფნას გამოთქვამს თანამდებობიდან გადადგეს.
„ერთ შეხვედრაზე, რომელიც სამინისტროში იყო და რომელზეც მეორე დირექტორთან ერთად ვიყავი, გაგვაფრთხილეს, რომ რადგან აზრს პროექტის სახე ჰქონდა, შესაბამისად, არ გაგვეხმაურებინა ეს ამბავი. ამის მერე გავიდა ორი კვირა, დამირეკეს და მითხრეს, რომ ხელი უნდა მომეწერა მემორანდუმზე. დღის მეორე ნახევარი იყო და ალბათ, ჩემი შეცდომა იყო. რომ პედაგოგებს არ გადავურეკე",-აცხადებს ფანცულაია.
რაც შეეხება მემორანდუმის შინაარს, მისი თქმით პირველ ექსპერიმენტულ სკოლას არ ჰქონდა იმის რესურსი, რომ მიეღო ხუთი კლასი (დაახლოებით 150 ბავშვი), შესაბამისად, მათთან თხოვნა შევიდა ფართის გამოყოფასთან დაკავშირებით, რაზეც სკოლის ადმინისტრაცია დათანხმდა.
მისივე განმარტებით, მემორანდუმის თანახმად, 162-ე სკოლის პედაგოგებისთვის პირველი ექსპერიმენტული სკოლის პედაგოგებს ტრენინგები უნდა ჩაეტარებინათ, რისთვისაც ფართი 162-ე სკოლას უნდა გამოეყო.
რაც შეეხება განათლების სამინისტროს პოზიციას, მინისტრმა განაცხადა, რომ არც ერთი სკოლაში ოპტიმიზაცია და გაერთიანება არ იგეგმება.
"განათლების სამინისტროს მთავარი მიზანია, სკოლებმა ერთმანეთს გამოცდილება გაუზიარონ. ჩვენ ბევრი შეხვედრა გვქონდა პედაგოგებთან. იყო დეტალური საუბარი ამ მემორანდუმთან დაკავშირებით. ჩვენი მიზანია, რომ სკოლებმა ერთმანეთს გაუზიარონ გამოცდილება და სიახლეები. რაც შეეხება შიშებს, რომ შესაძლოა, გაერთიანდნენ სკოლები ან ოპტიმიზაცია მოხდეს, ეს არასწორო შიშებია. მესმის, რომ შესაძლოა, წინა წლების გავლენის შედეგად აქვთ ეს შიშები, მაგრამ მსგავსი არაფერი იგეგმება. უფრო მეტიც - ამ პროცესში კერძო სკოლებსაც ჩავრთავთ",- აღნიშნა ელექსანდრე ჯეჯელავამ.
