ანაკლიაში აშშ-ის საერთაშორისო განვითარების სააგენტოს (USAID) პროექტის ერთი ეტაპი დასრულდა.
პროექტი მიზნად ისახავს მდგრადი ეკონომიკური განვითარების ხელშეწყობას სამიზნე რეგიონებში. განსაკუთრებით ანაკლიასა და განმუხურში, ელექტრონული მუსიკის საერთაშორისო ფესტივალის (GEM Fest) გამართვსათან დაკავშირებით არსებული ინვესტიციებისა და შესაძლებლობების ეფექტიანად გამოყენებაში.
პროექტის პირველი ეტაპის შედეგები ანაკლიაში ფესტივალ Gem Fest-ის ორგანიზატორებთან ერთად საინფორმაციო შეხვედრაზე შეაჯამეს. შეხვედრას ფესტივალის დამფუძნებელი გიორგი სიგუა, USAID- ის წარმომადგენლები, ტურიზიმის ეროვნული ადმინისტრაციის ხელმძღვანელი გიორგი ჩოგოვაძე და ადგილობრივი ბიზნესის წარმომადგენლები ესწრებოდნენ.
ერთ-ერთი ბენეფიციარის თქმით, მათ ტრენინგის ფარგლებში ისწავლეს ასევე თავიანთი სასტუმროების შესახებ ინფორმაციის booking.com-ზე და სხვა მსგავს საიტებზე განთავსება.
„ნათელი გზა გამოჩნდა, ვიცით რა უნდა გავაკეთოთ და საით უნდა წავიდეთ. პირველი ჯავშანი შვეიცარიიდან გვქონდა, ეს ძალიან სასიხარულოა, რადგან მთელი მსოფლიოა ჩართული“, - განაცხადა „ჯი ეიჩ ენთან“ საუბრისას, ანაკლიაში მცხოვრებმა მარინა თოდუამ.
დღეის მდგომარეობით, ანაკლია-განმუხურში, ასევე მის მიმდებარე ტერიტორიაზე პროექტის ბენეფიციართა ყველა საცხოვრებელი სახლი დაჯავშვნილი ან გაყიდულია, როგორც მეზობელი ქვეყნებიდან, ისე ევროპიდან, ამერიკიდან, ბრაზილიიდან და ა.შ.
როგორც GEM Fest-ის დამფუძნებელმა და ორგანიზატორმა გიორგი სიგუამ „ჯი ეიჩ ენთან“ საუბრისას აღნიშნა, ფესტივალი Gem Fest-ი გინესის რეკორდების წიგნში შევა.
„რწმენა იმისი, რომ ანაკლია შეიძლება გახდეს მსოფლიო მნიშვნელობის კურორტი და მსოფლიო მნიშვნელობის ლოკაცია. ეს დაიჯერა უკვე ყველამ. ეს რწმენა და ენერგია გვაძლევს იმის საშუალებას, რომ მართლა განვახორციელოთ და შევთავაზოთ პლანეტას სრულიად ახალი ლოკაცია. ჩვენ წელს შევალთ გინესის რეკორდების წიგნში, როგორც ყველაზე ხანგრძლივი ფესტივალი, მაგრამ ამავე დროს უნდა ვაჩვენოთ მომსახურეობის, ინფრასტრუქტურის, გაუმჯობესებული სველი წერტილების ყველაზე მაღალი ხარისხი. ამისთვის ყველაფერს აკეთებს ხელისუფლება, ადგილობრივი მუნიციპალიტეტი, ჩვენი გუნდი, მოსახლეობა. 32 დღის, 24 საათის განმავლობაში 10 სცენაზე 3 ათასი ივენთის გამართვა, ასამდე კვებისა და გასართობი სავაჭრო ობიექტის შექმნა იქ, სადაც არის ჩვენი მთავარი ტკივილი, სადაც იწყება აფხაზეთი - ძალიან მნიშვნელოვანია. ეს არის ძალიან დიდი გამოწვევა და ჩვენ ყველანი ერთად ამ ყველაფერს ვაცნობიერებთ და ვაკეთებთ“, - განაცხადა „ჯი ეიჩ ენთან“ საუბრისას გიორგი სიგუამ.
შეგახსენებთ, რომ ელექტრონული მუსიკის ფესტივალი Gem Fest-ი საქართველოში 2015 წლიდან ტარდება და მუსიკალურთან ერთად ქვეყნის მნიშვნელოვან ტურისტულ მოვლენას წარმოადგენს.
გიორგი საკარული, ჯი ეიჩ ენი
ფოტო - გიგი ჭელიძე
