9 მაისს, მეორე მსოფლიო ომში ფაშისტურ გერმანიაზე გამარჯვების დღეს, რუს მოტოციკლეტისტთა კლუბი „ღამის მგლები“ საქართველოში ჩამოსვლას და ვაკის პარკში აქციის მოწყობას გეგმავს. საზოგადოების ნაწილი რუსი ბაიკერების თბილისში ჩამოსვლას აპროტესტებს. ისინი მთავრობასა და პრეზიდენტს მანიფესტით მიმართავენ.
,,არ შემოვუშვათ კრემლის მოტოციკლისტები საქართველოში!
ცნობილია რომ ამა წლის 9 მაისისთვის კრემლის ხელისუფლებასთან აფილირებული და ევროპის ქვეყნებში non-grata-დ გამოცხადებული მოტოციკლისტთა ჯგუფი, "ღამის მგლები", აპირებს საქართველოს საზღვრის გადმოკვეთას და, ადგილობრივ პროპუტინურ ძალებთან ერთად, თბილისში ვაკის პარკში აქციის მოწყობას.
მოვითხოვთ, რომ საქართველოს სახელმწიფომ მკაფიოდ აჩვენოს ყველას, რომ ის ჩვენი ქვეყნის ინტერესების და ღირსების სადარაჯოზე დგას და არ დაუშვებს ამ ჯგუფის საქართველოში შემოსვლას”, - წერია მანიფესტში.
მანიფესტს უკვე შეუერთდა 3 000 ხელმომწერი. მოტოციკლეტისტები გუშინ პოლონეთში არ შეუშვეს. შსს- ს ინფორმაციით კი, ,,ღამის მგლების“ საქართველოში მოსალოდნელ ვიზიტს სპეციალური კომისია გააკონტროლებს.
