ეუთოს ორდღიანი მისიის მიზანია იმის შეფასება, მედიაომბუდსმენის ინსტიტუტის ფორმით დაეხმარებიან საქართველოს, თუ ხანგრძლივი ექსპერტული მისიის ფორმით, - ამის შესახებ პარლამენტის პირველმა ვიცე სპიკერმა თამარ ჩუგოშვილმა საპარლამენტო უმრავლესობისა და ეუთოს ექსპერტების შეხვედრის დასრულების შემდეგ განაცხადა.
,,ჩვენ გვაქვს შესაძლებლობა ვუმასპინძლოთ მედიის საკითხებში ეუთოს უმაღლესი კომისრის წარმომადგენლებს. ზუსტად იმიტომ, რომ არის გარკვეული სპეკულაციები იმის გარშემო, რომ მედიის თავისუფლების კუთხით ქვეყანაში არსებობს გარკვეული გამოწვევები, ჩვენთვის მნიშვნელივანია, რომ ეუთოს წარმომადგენლები დღეს საქართველოში არიან, აფასებენ მდგომარეობას და მოგვიანებით გვექნება მათი რეკომენდაციები, თუ რა ფორმით ურჩევნიათ თანამშრომლობა საქართველოსთან - იქნება ეს მედიაომბუდსმენის ინსტიტუტი, თუ ხანგრძლივი ექსპერტული მისია. ამაზე ჯერჯერობით საბოლოო პასუხი არ მაქვს, რადგან ამ მისიის დასრულების შემდეგ გვეცოდინება მათი საბოლოო რეკომენდაციები. ზოგადად, მათი განწყობა არის ის, რომ საქართველოში ბოლო წლებში ძალიან მნიშვნელოვანი ნაბიჯებია გადაგმული მედიათავისუფლების კუთხით და გარემო თვისობრივად განსხვავებულია იმისგან, რაც იყო 2012 წლამდე. ეს ცალსახად დაფიქსირდა. რაც შეეხება გამოწვევებს მედიის თავისუფლების კუთხით, აქ ბევრ საკითხზე შეიძლება საუბარი, მათ შორის, მედიის კონტენტის ხარისხის კუთხითაც და ა.შ. თუმცა, ეს ჩემი განსასჯელი, რა თქმა უნდა, არ არის. მე ზოგადად მგონია, რომ მედიის თავისუფლების, მედიის ხარისხის კუთხით ჩვენ შეგვიძლია ახალ ეტაპზე, შემდეგ ეტაპზე გადასვლა, უფრო მაღალი სტანდარტების დამკვიდრება და ჩვენთვის ძალიან მნიშვნელოვანია, რომ ეუთო ამ პროცესში ჩვენთან ერთად იქნება და მოგვეხმარება”,- განაცხადა ჩუგოშვილმა.
