ნაძალადევის რაიონში დაზიანებული, ხმელი ხეების მოჭრა და სხვლა-ფორმირება აქტიურად მიმდინარეობს. 2017 წლის თებერვლიდან დღემდე შესაბამისი სამუშაოები 120 მისამართზე განხორციელდა. ასევე, მოსახლეობასთან შეთანხმებით, გამხმარი ხეების მოჭრის შემდეგ ხდება კუნძების დამუშავება-გატანა.
დედაქალაქის მერიის ინფორმაციით, მოქალაქეების მოთხოვნის საფუძველზე, ნაძალადევის რაიონის გამგეობამ კონტრაქტორ კომპანიას კიდევ 50 ახალ მისამართზე მისცა დავალება, სადაც სამუშაოები მაისის ბოლომდე შესრულდება. ხმელი ხეების მოჭრის და სხვლა-ფორმირების შემდეგ შეშა, გამგეობის ორგანიზებით, სოციალურად დაუცველ მოსახლეობას ურიგდება.
