ოთხდღიანი სამუშაო ვიზიტის ფარგლებში ყაზახური მხარე გაეცნობა სამოქალაქო ავიაციის სააგენტოს მიერ გაწეულ საქმიანობას როგორც ICAO-ს სტანდარტებთან შესაბამისი საავიაციო უშიშროების მარეგულირებელი კანონმდებლობის შემუშავების, ისე აღნიშნული ნორმატიული აქტებით გათვალისწინებული მოთხოვნების შესრულებაზე ზედამხედველობის კუთხით. გაზირებული იქნება აგრეთვე, სამოქალაქო ავიაციის საერთაშრისო ორგანიზაციის (ICAO) ახალი მიდგომის - უწყვეტი მონიტორინგის ფარგლებში 2015 წელს სააგენტოში ჩატარებული აუდიტის მიღების პრაქტიკული გამოცდილება. აღნიშნული მიდგომით ICAO-ს საავიაციო უშიშროების აუდიტს ყაზახეთი 2017 წელს გაივლის.

ვიზიტის დასასრულს ყაზახეთის საავიაციო უშიშროების უზრუნველყოფაზე და ზედამხედველობაზე უფლებამოსილი ორგანოების წარმომადგენლები გაეცნობიან თბილისის საერთაშორისო აეროპორტის საავიაციო უშიშროების უზრუნველყოფის ზომებს და შესაბამის ინფრასტრუქტურას.

ICAO-ს ოფიციალური დასკვნის მიხედვით, 2015 წელს სამოქალაქო ავიაციის სააგენტოში ჩატარებული აუდიტის შედეგების თანახმად, საავიაციო უშიშროების უზრუნველყოფის ზედამხედველობის თვალსაზრისით საქართველოს საერთო მაჩვენებელმა 87.8% შეადგინა. უშიშროების უზრუნველყოფის ზედამხედველობის კუთხით, ქვეყანამ ICAO-ს აუდიტს 2008 წელსაც უმასპინძლა. მაშინ საქართველოს საერთო მაჩვენებელი 58%-ს უტოლდებოდა. 2015 წელს ჩატარებული აუდიტის შედეგად მიღებული საერთო მაჩვენებლებით, საქართველომ ერთ-ერთი ყველაზე საუკეთესო შედეგი აჩვენა რეგიონში. შესაბამისი გამოცდილების გაზიარების მიზნით, 2016 წელს სააგენტოს ყირგიზეთის საავიაციო ხელისუფლების საავიაციო უშიშროების დეპარტამენტის წარმომადგენლებიც სტუმრობდნენ.