ირანთან ორმხრივი ვაჭრობა 50%-ით გაიზარდა - ამის შესახებ საქართველოს საგარეო საქმეთა მინისტრმა მიხეილ ჯანელიძე ირანელ კოლეგასთან მოჰამედ ჯავად ზარიფთან ერთად გამართულ პრესკონფერენციაზე განაცხადა. ჯანელიძის თქმით, ირანში საქართველოსთვის ხელსაყრელ ბიზნეს საინვესტიციო კლიმატია.
„თუნდაც, ის ფაქტი, რომ ბოლო ერთი წლის განმავლობაში დაფიქსირდა ირანული ინვესტიციების 90%-იანი ზრდა. ამასთან, გასულ წელს საფუძველი ჩაეყარა სუფსის ნავთობგადამამუშავებელ საწარმოს პროექტს, რომლის ჯამური ინვესტიცია 1.5 მილიარდია და მხარეები აქტიურად მუშაობენ პროექტის განხორციელებაზე“, - განაცხადა მიხეილ ჯანელიძემ.
ამასთან, საგარეო საქმეთა მინისტრის განცხადებით, ურთიერთობის ერთ-ერთ მთავარ მიმართულებას წარმოადგენს ტურისტების მზარდი დინამიკა.
„2016 წელს ირანელი ტურისტების რაოდენობა საქართველოში 5-ჯერ გაიზარდა და ეს ტენდენცია გრძელდება. ტურიზმის სფეროში თანამშრომლობა ხელს შეუწყობს საქართველოსა და ირანს შორის პირდაპირ ავიაფრენებს“, - განაცხადა მიხეილ ჯანელიძემ.
მიხეილ ჯანელიძემ ირანელ კოლეგას მადლობა გადაუხადა საქართველოს ტერიტორიული მთლიანობისა და სუვერენიტეტის მხარდაჭერისთვის.
