სამოქალაქო ავიაციის სააგენტო 6 წლისაა. 2011 წლის 15 აპრილს, საავიაციო, საზღვაო და სახმელეთო ტრანსპორტის დარგებმა საქართველოს ეკონომიკისა და მდგრადი განვითარების სამინისტროს შემადგენლობაში ერთმანეთისაგან დამოუკიდებლად განაგრძეს ფუნქციონირება და განვითარება.
უწყების ინფორმაციით, ქვეყნის საავიაციო ხელისუფლების დამოუკიდებელ უწყებად გამოყოფის მიზანს, დარგის ზედამხედველობის ხარისხის გაუმჯობესება და საერთაშორისო სტანდარტების შესაბამისად გარდაქმნა წარმოადგენდა. ამასთან, საავიაციო უსაფრთხოებასა და უშიშროებაზე პასუხიმგებელი უწყების დამოუკიდებელ ორგანიზაციად ჩამოყალიბება იყო როგორც სამოქალაქოა ვიაციის საერთაშორისო ორგანიზაციის ისე ევროპის კომისიის რეკომენდაცია.
რეფორმამ სამოქალაქო ავიაციის სააგენტოს შესაძლებლობა მისცა, ჩამოეყალიბებინა საავიაციო დარგში არსებული მსოფლიო პრაქტიკის შესაბამისი ორგანიზაციული სტრუქტურა, საზედამხედველო საქმიანობის სრულფასოვნად განხორციელებისათვის აეყვანა ახალი და შეენარჩუნებინა კვალიფიციური პერსონალი, ასევე ჰქონოდა საკმარისი ფინანსური რესურსები მათი სწავლებისა და პროფესიული გადამზადებისთვის. დღეს ქვეყნის საავიაციო ხელისუფლება უფრო მაღალი ხარისხით უზრუნველყოფს მასზე დელეგირებული ეროვნული და საერთაშორისო ვალდებულებების შესრულებას, ვიდრე ეს იყო წლების წინ. ფრენების უსაფრთხოების, საავიაციო უშიშროების, საავიაციო კანონმდებლობისა და მომსახურების ხარისხის გაუმჯობესებესებაზე სამოქალაქო ავიაციის სააგენტოში განხორცილებული აუდიტების შედეგებიც მოწმობენ. 2016 წელს, საქართველომ პირველად გადააჭარბა ICAO-ს საავიაციო უსაფრთხოების გლობალური გეგმით დადგენილ 60%-იან მაჩვენებელს და 64.52%-იანი შედეგი აჩვენა.
ფრენების უსაფრთხოების ინტერესებიდან გამომდინარე სააგენტო თანმიმდევრულად ახორციელებს არსებული სტანდარტების გაუმჯობესებას საერთაშორისო საავიაციო ორგანიზაციების (ICAO, EASA, EUROCONTROL, ECAC) მოთხოვნების შესაბამისად. იხვეწება საქართველოში რეგისტრირებული ავიასაწარმოების სერტიფიცირებისა და ზედამხედველობის პროცედურები. ევროკავშირის ტრანსპორტის დირექტორატთან მჭიდრო კონსულტაციების ფარგლებში მიმდინარეობს ფრენის უსაფრთხოებასთან, საავიაციო უშიშროებასთან, მომხმარებელთა უფლებების დაცვასთან, საჰაერო მოძრაობის მართვასთან და ა.შ. დაკავშირებული საავიაციო კანონმდებლობის დახვეწა და ევროკავშირის საავიაციო მარეგულირებელ აქტებთან შესაბამისობაში მოყვანა, „ერთიანი საჰაერო სივრცის შესახებ საქართველოს, ევროკავშირს და მის წევრ სახელმწიფოებს შორის შეთანმხებით (CAA-A) ნაკისრი ვალდებულებების შესაბამისად.
სააგენტო აქტიურ როლს ასრულებს ქვეყნის მიერ დეკლარირებული საჰაერო მიმოსვლის ლიბერალიზაციის პოლიტიკის გატარებაში. საავიაციო ბაზარზე დაშვების გამარტივებული პროცედურები დადებითად მოქმედებს ქართული საავიაციო ბაზრის განვითარებაზე და ახალი ავიკომპანიების მოზიდვის პროცესზე.
საქართველოს საავიაციო ხელისუფლება სულ უფრო ხშირად არის წარმოდგენილი საერთაშორისო საავიაციო ორგანიზაციების სამუშაო და მმართველ ჯგუფებში (RASG ICAO, EASA PANEP, EASA Management Board Meeting, PT/EAST ICAO, RICS SAFA და სხვ.) წევრის ან დამკვირვებლის სტატუსით. სააგენტოს სპეციალისტების აქტიური ჩართულობის საპასუხოდ, ორგანიზაციას მიღებული აქვს არაერთი მადლობის წერილი პარტნიორი უწყებების მხრიდან. სააგენტოს რამდენიმე ინსპექტორი მონაწილეობს აგრეთვე საერთაშორისო აუდიტებში.
