საქართველოს პრემიერმინისტრი გიორგი კვირიკაშვილი დღევანდელ მთავრობის სხდომაზე ქუთაისის აეროპორტში სარკინიგზო ხაზის მშენებლობის პროექტს გამოეხმაურა. კვირიკაშვილმა განაცხადა, რომ ქუთაისის აეროპორტთან სარკინიგზო გაჩერება უმნიშვნელოვანესი ინფრასტრუქტურული პროექტი, რომელიც მთავრობის 4-პუნქტიანი განვითარების გეგმის ერთ-ერთი კომპონენტის - სივრცითი მოწყობის ნაწილია.
„ეს იქნება დაახლოებით 12 მატარებელი 24 საათის განმავლობაში, რაც იმას ნიშნავს, რომ პრაქტიკულად საქართველოს ყველა წერტილიდან, აეროპორტის მიმართულებით თუ პირიქით, საქართველოს ნებისმიერ წერტილში მისვლა ძალიან იოლი იქნება. ეს თავისთავად ნიშნავს იმას, რომ ქუთაისი ხდება ძალიან მნიშვნელოვანი ცენტრი ლოგისტიკური, ტურისტული თვალსაზრისით, პირველ რიგში ჩვენი მოქალაქეებისთვის“, - დასძინა პრემიერმა.
გიორგი კვირიკაშვილი იმედოვნებს, რომ პროექტი დასახელებული ერთ წელზე ნაკლებ დროში დასრულდება.
ქუთაისის აეროპორტთან დამაკავშირებელი 3-კილომეტრიანი სარკინიგზო ხაზისა და სადგურის მშენებლობა 3 აპრილს დაიწყო.
