"საქართველოში სავალალო მდგომარეობაა, ევროპაში მეორე ქვეყანაა მწეველთა რაოდენობის მიხედვით", - ამის შესახებ საპარლამენტო უმრავლესობის წევრმა გუგული მაღრაძემ პარლამენტში განაცხადა, სადაც "თამბაქოს კონტროლის" შესახებ კანონპროექტს განიხილავენ.
მისი თქმით, მიუხედავად იმისა, რომ ყველას გაცნობიერებული აქვს, მოწევა მავნებელია ჯანმრთელობისთვის, მწეველთა რაოდენობა მაინც იზრდება.
"სკოლაში არასრულწლოვნის მიერ თამბაქოს მოხმარება საკმაოდ ხშირია. რეგულარული მოწევის დაწყების ასაკია 13 წელი, რაც შემაშფოთებელია. ვინაიდან არასათანადო რეგულაციებია, ერთ სივრცეში არიან მწეველები და არამწეველები. იშვიათად დამისახელებთ საქართველოში ადგილს, თამბაქოს კვამლით რომ არ იყოს გაჟღენთილი. ამას სათანადო რეგულაციები სჭირდება. გარდა იმისა, რომ პარლამენტმა გამოიჩინა ამ საკითხის დარეგულირების პოლიტიკური ნება, ამაში მოსახლეობაც ხელს გვიწყობს", - აღნიშნა გუგული მაღრაძემ.
დეპუტატის ინფორმაციით, თამბაქოს მოხმარებას სერიოზულ პრობლემად მიიჩნევს მოსახლეობის 90%. საჯარო დაწესებულებებში თამბაქოს მოხმარების აკრძალვას მხარს უჭერს 89%,კულტურულ დაწესებულებებში 92%, საზოგადოებრივი კვების ობიექტებში 79.1%.
"ერთია, ადამიანი ვერ ანებებს თავს თამბაქოს მოწევას, მეორეა, მას გაცნობიერებული აქვს, რომ თამბაქოს მოხმარება დამღუპველია მისთვის და სწორედ კანონმდებლობა უნდა დაეხმაროს ასეთ ადამიანებს იმაში, რომ მათ შეძლონ თამბაქოს მოწევისთვის თავის დანებება. ხშირად არის ხოლმე ასეთი კონტრარგუმენტები, თუ კი კვების ობიექტებში არ იქნება ნებადართული თამბაქოს მოწევა, დიდი ფინანსური ზარალი ექნებათ, რადგან ადამიანები აღარ ივლიან.
კვლევა გვიჩვენებს, თუ მოწევა საზოგადოებრივ კვების ობიექტებში აიკრძალება, ვიზიტების სიხშირეს არ შეცვლის 69%, შეამცირებს 9 %, გაზრის 17%, საბოლოოდ, თითქმის 85%-ით იზრდება იმ ადამიანების რიცხვი, რომლებიც პირიქით, უფრო მეტად ივლიან ამ დაწესებულებებში, თუ იქ თამბაქოს მოხმარება აკრძალული იქნება", - განაცხადა გუგული მაღრაძემ.
