„საქართველო ძალ-ღონეს არ იშურებს გამართული მთის სათხილამურო კურორტების გასავითარებლად და ყველა პროექტის განსახორციელებლად საერთაშორისო სტანდარტების შესაბამისად“, - - ამის შესახებ საქართველოს პრემიერ-მინისტრმა გიორგი კვირიკაშვილმა ევროპისა და აზიის მთის კურორტების საერთაშორისო კონფერენციაზე სიტყვით გამოსვლისას განაცხადა.
გიორგი კვირიკაშვილის განცხადებით, ტურიზმის ინდუსტრიის განვითარებისადმი მთავრობის თანმიმდევრული და ეტაპობრივი მიდგომის შედეგად, საქართველოში დაფიქსირდა საერთაშორისო სტუმრების რაოდენობის მნიშვნელოვანი ზრდა.
„2016 წელს ქვეყანაში დაფიქსირდა რეკორდი - 6,3 მილიონი ტურისტი, ხოლო ტურიზმიდან შემოსავლებმა გადააჭარბა 2 მილიარდ დოლარს. უვიზო მიმოსვლა საქართველოს მოქალაქეთათვის, რომელიც ევროკავშირმა სულ ახლახან დაამტკიცა, არის უმნიშვნელოვანესი მიღწევა, რომელიც კიდევ უფრო გააღრმავებს და წაახალისებს ადამიანებს შორის კონტაქტებს, ბიზნესურთიერთობებსა და ტურიზმს. მდივანო რიფაი, ვსარგებლობ ამ შემთხვევით, რათა მოგახსენოთ დიდი მადლობა იმ ძალისხმევისთვის და შრომისთვის, რომელიც თქვენ ბოლო რვა წლის განმავლობაში გაიღეთ მსოფლიო ტურიზმის ინდუსტრიის გასაძლიერებლად და გასავითარებლად. სწორედ გაეროს მსოფლიო ტურიზმის ორგანიზაციისა და პირადად თქვენმა ლიდერობამ უზრუნველყო ძლიერი მუხტი ამ სექტორის განვითარებაში, რის შედეგადაც მან წარმატებული საქმიანობის ახალ საფეხურს მიაღწია“, - განაცხადა გიორგი კვირიკაშვილმა.
