“მინდა მივმართო ჩვენი კულტურის სფეროს წარმომადგენლებს, რომ გამოიყენონ შესაძლებლობები და აქტიურად ჩაერთონ ევროკავშირის პროგრამებში“-ამის შესახებ საქართველოს საგარეო საქმეთა მინისტრმა მიხეილ ჯანელიძემ, საგარეო საქმეთა სამინისტროში გამოფენის „საქართველოს ევროპული ფურცლები“ გახსნის ცერემონიაზე განაცხადა.
მინისტრის თქმით კულტურის სფეროში საქართველო ევროკავშირის სხვადასხვა პროგრამებში მონაწილეობს, რაც გზას უხსნის საქართველოს კულტურის სფეროს მოღვაწეებს განავითარონ თანამშრომლობა საკუთარ კოლეგებთან ევროკავშირის წევრ ქვეყნებში.
„მინდა მივმართო ჩვენი კულტურის სფეროს წარმომადგენლებს, რომ გამოიყენონ შესაძლებლობები და აქტიურად ჩაერთონ ევროკავშირის პროგრამებში. ერთ-ერთი ასეთი პროგრამაა „შემოქმედებითი ევროპა“, რომლის ასოცირებული პარტნიორიც საქართველო 2015 წელს გახდა. ეს არის ევროკავშირის 7-წლიანი პროგრამა, რომელიც დამატებით შესაძლებლობებს უხსნის საქართველოს კულტურის სფეროში მოქმედ ორგანიზაციებს»-განაცხადა მინისტრმა.
მინისტრმა მოწვეულ სტუმრებს ხელნაწერთა ეროვნულ ცენტრთან ერთად ორგანიზებული გამოფენის შესახებ ესაუბრა. მისი თქმით გამოფენაზე წარმოდგენილი ექსპოზიციები ნათლად ასახავს საქართველოსა და ევროპის ისტორიულ, მეგობრულ ურთიერთობებს და მკაფიოდ წარმოაჩენს, რომ საქართველო ევროპული ცივილიზაციის, მისი ისტორიული, გეოგრაფიული და კულტურული სივრცის განუყოფელი ნაწილია.
გამოფენაზე წარმოდგენილია პირადი საარქივო მასალები, ქართული და ლათინური ხელნაწერი კოლექციები, ილუსტრაციები, უძველესი რარიტეტების ფრაგმენტები, პირველი ქართული ნაბეჭდი წიგნები.
გამოფენა, რომელსაც დღეს საგარეო საქმეთა სამინისტრომ უმასპინძლა რამდენიმე თვის განმავლობაში საქართველოს რეგიონებს მოივლის. ასევე საქართველოს დიპლომატიური წარმომადგენლობების მეშვეობით ევროპასთან ისტორიული კავშირების ამსახველი ხელნაწერი მემკვიდრეობა გამოიფინება მსოფლიოს მრავალი ქვეყნის დედაქალაქში.
პროექტი მომზადდა საქართველოს ხელნაწერთა ეროვნულ ცენტრთან თანამშრომლობით.
