სხვადასხვა სპორტული სახეობების ალტერნატიული დარბაზების მოწყობა უკვე დასრულებულია. სპორტული ფედერაციები თავიანთ საქმიანობას ახალ, გარემონტებულ შენობებში აგრძელებენ.
აჭარის ფინანსთა და ეკონომიკის მინისტრი რამაზ ბოლქვაძე, აჭარის განათლების, კულტურისა და სპორტის მინისტრი ინგა შამილიშვილი და „ორბი ჯგუფის“ დირექტორი ირაკლი კვერღელიძე ბათუმი მოლში, გორგილაძის ქუჩაზე და ბათუმის შოთა რუსთაველის სახელმწიფო უნივერსიტეტში არსებული სპორტული ცენტრების ფუნქციონირებას გაეცნენ. პარალელურად ლეონიძის ქუჩაზე პორტული კომპლექსის მშენებლობისთვის საჭირო პროცედურები მიმდინარეობს.
ტენდერში გამარჯვებულმა კომპანიამ უკვე მოამზადა შენობის პროექტის ესკიზი, რომლის პრეზენტაცია სპორტული სახეობების წარმომადგენლებისთვის უახლოეს დღეებში გაიმართება.
ყველა მხარის ჩართულობით, საბოლოო პროექტის შერჩევის შემდეგ მშენებლობის ტენდერი გამოცხადდება და სამშენებლო სამუშაოები დაიწყება. ლეონიძის ქუჩაზე სპორტული კომპლექსი 23 000 კვ.მეტრ ტერიტორიაზე აშენდება და სხვადასხვა სპორტული სახეობების სექციები განთავსდება:
. სპორტული ტანვარჯიში; მხატვრული ტანვარჯიშის დარბაზი; ბ/რ ჭიდაობის დარბაზი; თავისუფალი ჭიდაობის დარბაზი; სპორტული ცეკვების დარბაზი; ჭადრაკის დარბაზი; ტაეკვონდოს დარბაზი; ქართული საბრძოლო ხელოვნების დარბაზი; უნივერსალური ტრანსფორმირებადი დარბაზი; კრივის დარბაზი. თანამედროვე სტანდარტების სპორტულ კომპლექსში გასახდელები, საპირფარეშოები, დამხმარე და საინვენტარო სათავსოები და სასტუმრო მოეწყობა.
შენობას ასევე ღია ავტოსადგომი ექნება.
აჭარის ფინანსთა და ეკონომიკის სამინისტრომ სასპორტო სკოლის უკან არსებული ორი სპორტული ცენტრის ტერიტორიის პრივატიზება განახორციელა, რომელშიც შპს „ორბი ჯგუფი“ 200 მლნ ლარზე მეტის ინვესტირებას გეგმავს. სანაცვლოდ სამინისტრო ლეონიძის ქუჩაზე ახალი თანამედროვე სტანდარტების სპორტული კომპლექსის მშენებლობას იწყებს.
