გამომცემლები განათლების სამინისტროს წინააღმდეგ გამოდიან. სხვადასხვა გამომცემლობის წარმომადგენლები ამბობენ, რომ განათლების სამინისტროს მიერ შემუშავებულ გრიფირების წესი მათ აზარალებს და არათანაბარ პირობებში აყენებს. საქმე ისაა, რომ როდესაც წიგნი გრიფირებას გაივლის, ამის შემდეგ ტენდერი უნდა გამოცხადდეს და გამოვლინდეს ის გამომცემელი, რომელიც სკოლაში სახელმძღვანელოს შეიტანს. გამომცემლები ამბობენ, რომ აქცენტი დაბალ ფასზე გაკეთდება და სკოლებში უხარისხო წიგნები შევა. კიდევ ერთი პრეტენზია აქვთ გამომცემლებს. მას შემდეგ, რაც წიგნი ყველა სტანდარტს დააკმაყოფილებს, სახელმძღვანელოს არა გამომცემლები, არამედ განათლების სამინისტრო თავად დაბეჭდავს.
განათლებისა და მეცნიერების მინისტრის მოადგილე თეიმურაზ მურღულიას ინფორმაციით, სასკოლო სახელმძღვანელოების გრიფირების საკითხზე ტენდერი 31 მარტს გამოცხადდება. მინისტრის მოადგილის თქმით, ტენდერის გამოცხადების საკითხზე უწყების გადაწყვეტილება არ გადაიხედება. რაც შეეხება გრიფირებულ წიგნებს, მურღულიას განმარტებით, სამინისტრო იყიდის სახელმძღვანელოს, რომელიც მისთვის მისაღები იქნება და უწყება არც ამ გადაწყვეტილების გადახედვას გეგმავს.
