თბილისის საკრებულოს ქონების მართვისა და საფინანსო - საბიუჯეტო კომისიის თავმჯდომარემ ჯაბა სამუშიამ ,,ბავშვთა სამყაროს” ხანძრის შედეგად დაზარალებულებთან დაკავშირებით კომენტარი გააკეთა. მისი თქმით, დაზარალებულებთან თბილისის მუნიციპალიტეტის საკრებულოში ბოლო ორი კვირაა შეხვედრები იმართება .
ჯაბა სამუშიას განცხადებით, თბილისის მუნიციპალიტეტი პროცესში თავიდანვე იყო ჩართული და ამ ეტაპზე გარკვეული ერთჯერადი ფინანსური დახმარების დროულად გაწევის მიზნით დაზარალებულთა სიების დაზუსტება მიმდინარეობს.
„სიების დაზუსტების პროცესი, რომელიშიც თავად ხანძრის შედეგად დაზარალებულები და ადმინისტრაცია მონაწილეობს, ჩვენგან დამოუკიდებელი მიზეზების გამო გაგრძელდა’’,- განაცხადა ჯაბა სამუშიამ.
თავად დაზარალებულების განცხადებით კი, სიების თავდაპირველ ვარიანტში ისეთი ადამიანებიც მოხვდნენ, რომლებმაც საკუთარი პროდუქცია ხანძრისგან გადაარჩინეს და შესაბამისად, არანაირი მატერიალური ზარალი არ განუცდიათ.
როგორც დეპუტატმა განმარტა, თბილისის მუნიციპალიტეტისთვის ზარალის რაოდენობას გადამწყვეტი მნიშვნელობა არ აქვს, რადგან მისი სრულად ანაზღაურება დედაქალაქის მერიისა და საკრებულოს კომპეტენციას არ განეკუთვნება.
