თბილისის მუნიციპალიტეტის საკრებულოს მთაწმინდის რაიონის მაჟორიტარმა დეპუტატმა ჯაბა ჯიშკარიანმა ამავე რაიონის გამგებელთან გელა არჩვაძესთან ერთად ძმები ზუბალაშვილების ქ.N:52-ში მდებარე კულტურული მემკვიდრეობის ძეგლის სტატუსის მქონე ავარიული შენობის მიმდინარე სარეაბილიტაციო სამუშაოები დაათალიერა.
ისტორიულ შენობას, რომელიც ავარიულობიდან გამომდინარე, საფრთხეს როგორც ამ სახლის მობინადრეებს, ასევე მომიჯნავე ეზოებში მცხოვრებ ოჯახებსაც უქმნიდა, თანადაფინანსებული პროექტის ფარგლებში, სარეაბილიტაციო სამუშაოები ჩაუტარდება, კაპიტალურად გამაგრდება სახლის საძირკველი, მზიდი კედლები და ეზოში შესასვლელი თაღი.
გასულ წელს მთაწმინდის გამგეობამ გამაგრებითი სამუშაოები 17 ავარიულ საცხოვრებელ სახლს ჩაუტარა.
