უახლოესი 3 წლის განმავლობაში სასტუმროთა ქსელი Marriott-ი მსოფლიოში ყოველ 14 საათში ახალ სასტუმროს გახსნის. აღნიშნული სტრატეგია კომპანიის მენეჯმენტმა უკვე დაამტკიცა.
Marriott-ის პორტფელიო 1 მლნ-ზე მეტ სასტუმრო ნომერს აერთიანებს. 2017-2019 წლებში Marriott-ი 285 ათასიდან 300 ათასამდე სასტუმრო ნომრის დამატებას გეგმავს. რაც ექსპერტების შეფასებით კომპანიას 675 მლნ დოლარის შემოსავალს მოუტანს.
„ჩვენ მომავალს ოპტიმიზმით შევყურებთ. მოსალოდნელია, რომ უახლოესი 10 წლის განმავლობაში მოგზაურთა რაოდენობა მსოფლიოში 7%-ით გაიზრდება“, აცხადებს Marriott International-ის პრეზიდენტი და აღმასრულებელი დირექტორი არნე სორენსენი.
შეგახსენებთ, რომ 2016 წელს Marriott-მა სასტუმროთა მფლობელი კომპანია Starwood-ი შეიძინა. დღეისათვის ის 122 ქვეყანაში 30 ბრენდს აკონტროლებს და მასზე მსოფლიოს სასტუმრო ინდუსტრიის 8%-ი მოდის.
