თურქეთი უცხო ქვეყნის მოქალაქეებს Turkuaz-ის ბარათებს სთავაზობს, რომელიც უვადო ბინადრობას და მოქალაქეობას ითვალისწინებს. აღნიშნულის შესახებ ინფორმაცია თურქეთის ოფიციალურ სამთავრობო გაზეთში უკვე გამოქვეყნდა, რითაც შესაბამისი დებულება ძალაში შევიდა.  დებულება კი უცხო ქვეყნის მოქალაქეებზე ე.წ. Turkuaz-ის (ფირუზი) სახელწოდების ბარათების გაცემას არეგულირებს. Turkuaz-ი გაცემა თურქეთში უცხოელი ინვესტორების  მოზიდვას ითვალისწინებს.

ბარათები თურქეთის არარეზიდენტებს საწყის ეტაპზე სამი წლის ვადით გადაეცემათ, ხოლო შემდეგ უვადო გახდება და მის მფლობელებს სურვილის შემთხვევაში თურქეთის მოქალაქეობის მიღებაც შეეძლებათ.

Turkuaz-ის ბარათის მიღება შეეძლებათ უცხო ქვეყნის მოქალაქეებს:

- რომლებსაც ექნებათ უმაღლესი დონის განათლება და პროფესიული ცოდნა-გამოცდილება. ასევე გარკვეული წვლილი ექნებათ მეცნიერებისა და ტექნოლოგიების განვითარებაში შეტანილი, ან იქნებიან მსგავსი მაღალკვალიფიციური სამუშაო ძალის მქონე სპეციალისტები,

- იქნებიან საინვესტიციო-საექსპორტო დონისა და დასაქმების შესაძლებლობის მქონე მაღალკვალიფიციური ინვესტორები,

- იქნებიან ისეთი მეცნიერ-მკვლევარები, რომლებიც ხელს უწყობენ მეცნიერებისა და ტექნოლოგიის განვითარებას, ე.ი. აქვთ საერთაშორისო დონეზე აღიარებული სტრატეგიული კვლევები,

- საერთაშორისო წარმატებები აქვთ მოპოვებული კულტურის, ხელოვნების ან სპორტის სფეროში,

- ხელს შეუწყობენ თურქეთის ან თურქული კულტურის საერთაშორისო დონეზე აღიარებას და პოპულარიზაციას, აქტიურ მონაწილეობას მიიღებენ  თურქეთის ეროვნული ინტერესების გამთვალისწინებელ საერთაშორისო დონის ქმედებებში,

ბარათის მფლობელებისათვის მინიჭებული უფლება-მოვალეობები კი შემდეგია:
- მათ ექნებათ განუსაზღვრელი ვადით მუშაობის ნებართვა;
-  თავისუფალნი იქნებიან სამხედრო სამსახურისგან;

- ისინი ვერ ისარგებლებენ საარჩევნო უფლებებით და ვერ იმუშავებენ საჯარო სამსახურში;

- მათ ისეთივე უფლებები ექნებათ ბინადრობის, მოგზაურობის, მუშაობის, სწავლის, საინვესტიციო და კომერციულ საქმიანობებში, როგორც თურქეთის მოქალაქეებს;

- სამწლიანი დროებითი ბინადრობის დასრულების შემდეგ, თუ ეროვნული უსაფრთხოებისა და საზოგადოებრივი წესრიგის თვალსაზრისით რაიმე შემაფერხებელი გარემოება არ იქნება დაფიქსირებული, მაშინ, მას, ანდა მის ოჯახის წევრებს, სურვილის შემთხვევაში, თურქეთის მოქალაქეობა მიეცემათ

ამავე დებულებით, თურქეთის უნივერსიტეტებში მოსწავლე უცხოელი სტუდენტები თუ დააკმაყოფილებენ ამ პირობებს, მაშინ, სწავლის დასრულების შემდეგ მათაც შეეძლებათ Turkuaz-ის ბარათის მიღება