საქართველოში მცირე და საშუალო საწარმოებისთვის 50 მილიონი ევრო გამოიყოფა. ევროპის საინვესტიციო ფონდმა და პროკრედიტ ბანკი საქართველომ ხელი InnovFin-ის პირველ გარიგებას მოაწერეს
ბანკის ინფორმაციით, გასულ კვირას ევროპის საინვესტიციო ფონდმა და პროკრედიტ ბანკმა ხელი მოაწერეს InnovFin-ის ხელშეკრულებას ლუქსემბურგში. აღნიშნული შეთანხმება სარგებელს მოუტანს საქართველოში მოქმედ ინოვაციურ მცირე და საშუალო ბიზნესებს, ასევე, მცირე კაპიტალიზაციის საწარმოებს.
InnovFin-ის ხელშეკრულება (ამ ტიპის ხელშეკრულება პირველია საქართველოში) გულისხმობს, რომ ევროპის საინვესტიციო ფონდის მიერ გაცემული გარანტიის საფუძველზე და ევროკავშირის კვლევისა და ინოვაციის პროგრამის „ჰორიზონტი 2020“-ის მხარდაჭერით, პროკრედიტ ბანკს მიეცემა შესაძლებლობა გასცეს სესხები საქართველოში მოქმედ ინოვაციურ კომპანიებზე, მომდევნო ორი წლის განმავლობაში. InnovFin-ის გარანტია ფარავს პროკრედიტ ბანკი საქართველოს მიერ გაცემული თითოეული სესხის 50%-ს. იგეგმება 50 მილიონი ევროს საკრედიტო პორტფელის გენერირება.
„ჩვენი კვლევისა და ინოვაციის პროგრამა „ჰორიზონტი 2020“ ღიაა მსოფლიოსთვის. ურთიერთობა აღმოსავლეთ ევროპის ქვეყნებთან, ამჯერად საქართველოსთან, ჩვენი სტრატეგიის მნიშვნელოვან ნაწილს წარმოადგენს. დადებული გარიგება ჩვენს თანამშრომლობას ერთი ნაბიჯით წინ წასწევს. ეს დაეხმარება საქართველოს ეკონომიკას, რადგან ქართულ კომპანიებს უკვე ექნებათ შესაძლებლობა ისარგებლონ ევროკავშირის გარანტიის საფუძველზე გაცემული სესხებით, რაც აამაღლებს მათი კვლევისა და ინოვაციის პოტენციალს“, განაცხადა კვლევის, მეცნიერების და ინოვაციის განვითარების საკითხებში ევროკომისარმა კარლოს მოედასმა.
„მივესალმები საქართველოში InnovFin-ის პირველი ხელშეკრულების გაფორმებას. აღნიშნული ხელშეკრულება საშუალებას მისცემს პროკრედიტ ბანკ საქართველოს გააფართოვოს თავისი საფინანსო საქმიანობა, ხოლო საქართველოში მოქმედი ინოვაციური კომპანიები შეძლებენ უფრო მიმზიდველი საკრედიტო პროდუქტით ისარგებლონ“, განმარტა ევროპის საინვესტიციო ფონდის აღმასრულებელმა დირექტორმა პიერ-ლუიჯი ჯილიბერტმა.
„InnovFin-ის პროგრამა ძალიან მნიშვნელოვანია პროკრედიტ ბანკი საქართველოსთვის, რადგან ის საშუალებას გვაძლევს უფრო განვვითარდეთ და დავაფინანსოთ ისეთი ბიზნესები, რომელიც ქვეყნის ეკონომიკის ბირთვს წარმოადგენს. ჩვენ ორიენტირებულები ვართ მცირე და საშუალო საწარმოებზე, რომლებსაც აქვთ ინოვაციური ხედვა, პასუხობენ თანამედროვე ევროპულ სტანდარტებს და გეგმავენ მომავალში განვითარებას. ჩვენ ვართ ფინანსური ინსტიტუტი, რომელიც ყოველთვის მხარს დაუჭერს ასეთ ბიზნესს“, ამბობს
პროკრედიტ ბანკი საქართველოს დირექტორი ალექს მატუა.
„მოხარულები ვართ განვაცხადოთ, რომ InnovFin-ის საგარანტიო ხელშეკრულება, რომელიც უკვე წარმატებით გაფორმდა სამხრეთ აღმოსავლეთსა და აღმოსავლეთ ევროპაში მოქმედ ჩვენს რვა ბანკში, ახლა საქართველოში ფორმდება. ეს საქართველოს ინოვაციურ მცირე და საშუალო საწარმოებს გაუადვილებს დაფინანსების მიღებას. პროკრედიტ ჯგუფისთვის 2016 წელს გამოყოფილი თანხიდან ერთი მესამედი უკვე ათვისებულია ინოვაციური კომპანიების მხარდამჭერი პროექტებით.“ აღნიშნა პროკრედიტ ჰოლდინგის დირექტორთა საბჭოს წევრმა ბორისლავ კოსტადინოვმა.
InnovFin-ის გარანტიის მიზანია წაახალისოს ბანკები ან სხვა ფინანსური დაწესებულებები. სესხები გასცენ ისეთ მცირე და საშუალო ბიზნესებზე და მცირე კაპიტალიზაციის მქონე საწარმოებზე, რომლებსაც ესაჭიროებათ ინვესტიცია ან/და საბრუნავი საშუალებები კვლევების, განვითარების და ინოვაციური საქმიანობის დასაფინანსებლად.
