ხულო-გოდერძის 29 კილომეტრიანი გზის მონაკვეთის რეაბილიტაცია-რეკონსტრუქციის მიზნით ქუვეითის ფონდი საქართველოს 8 მლნ.ქუვეითურ დინარს გამოუყოფს.
პარლამენტში მთავრობის მიერ რატიფიცირებისთვის უკვე წარმოდგენილია „საქართველოსა და არაბთა ეკონომიკური განვითარების ქუვეითის ფონდს შორის სასესხო ხელშეკრულება „ბათუმი-ახალციხის გზის პროექტი (ხულო-გოდერძის მონაკვეთი)".
აღნიშნული პროექტი ასევე მოიცავს ამ მონაკვეთზე ოთხი ხიდის რეკონსტრუქციას, წყალგამტარი მილების, შესაბამისი სადრენაჟო სისტემების მოწყობას და საგზაო მოძრაობის უსაფრთხოებისთვის აუცილებელ მონიშვნებს.
სესხის ხანგრძლივობა 25 წელია (მათ შორის შეღავათიანი პერიოდი 5 წელი), წლიური საპროცენტო განაკვეთი კი 2 %-ს შეადგენს.
პროექტს საქართველოს რეგიონული განვითარებისა და ინფრასტრუქტურის სამინისტროს გამგებლობაში არსებული საქვეუწყებო დაწესებულება -საქართველოს საავტომობილო გზების დეპარტამენტი განახორციელებს.
