21 თებერვალს მსოფლიო გიდების საერთაშორიშო დღეს აღნიშნავს. ტურიზმის ეროვნული ადმინისტრაციის ხელმძღვანელი გიორგი ჩოგოვაძე გიდებს საერთაშორისო პროფესიულ დღეს ულოცავს.
„ძნელი სათქმელია თუ როდის გაჩნდა ეს პროფესია. მას შემდეგ, რაც ადამიანებმა სხვადასხვა ქვეყანაში მოგზაურობა დაიწყეს, გიდების არსებობაც აუცილებელი გახდა, თავიდან ამ როლის მორგება პრაქტიკულად ნებისმიერ განათლებულ ადამიანს შეეძლო, დღეს კი გიდობა უკვე პროფესიაა და თან საპატიო პროფესია.
შემთხვევითი არ არის, რომ გიდებს ჩვენი ქვეყნის ელჩებსაც უწოდებენ, რადგან სწორედ თქვენზეა დამოკიდებული თუ როგორ გააცნობთ საქართველოს ისტორიას, კულტურას , კულინარიას, ფოლკლორსა თუ ტრადიციებს უცხოელ სტუმრებს. იმ ყველაფერს, რითაც ნებისმიერი ქართველი ამაყობს.
სწორედ თქვენი დამსახურებაა, რომ აქ ჩამოსულ სტუმრებს საქართველოში მოგზაურობის სურვილი განმეორებით უჩნდებათ და ამბობენ, რომ ქართველები სტუმართმოყვარე ერი ვართ.
ტურიზმი ვითარდება, მოგზაურთა ნაკადები მატულობს, წელს რეკორდულ მაჩვენებელს მივაღწიეთ და 6 მილიონ ტურისტს გადავაჭარბეთ, შესაბამისად იზრდება თქვენი როლიც. მინდა წარმატებები გისურვოთ და იმედი გამოვთქვა, რომ ჩვენ ერთად, ტურიზმის ინდუსტრიაში ჩართული ყველა რგოლი, ბევრ რამეს მივაღწევთ და არანაკლებ წარმატებული წლები გვექნება“, აცხადებს გიორგი ჩოგოვაძე.
