საფინანსო-საბიუჯეტო კომიტეტის სხდომაზე, რომელსაც კომიტეტის თავმჯდომარე, ირაკლი კოვზანაძე უძღვებოდა, საქართველოს მთავრობის მიერ საკანონმდებლო ინიციატივის წესით წარმოდგენილი „რეგულირების საფასურის შესახებ" საქართველოს კანონში ცვლილების შეტანის თაობაზე" კანონპროექტი პირველი მოსმენისთვის განიხილეს. მთავრობის საკანონმდებლო ინიციატივა დეპუტატებს საქართველოს გარემოსა და ბუნებრივი რესურსების დაცვის მინისტრის მოადგილემ, მაია ბითაძემ წარუდგინა.
მომხსენებლის განმარტებით, კანონპროექტით ბუნებრივი რესურსებით სარგებლობის, ნავთობისა და გაზის გადამუშავების ან ტრანსპორტირების საქმიანობის რეგულირების საფასურის ოდენობა, სტრუქტურა და გადახდის წესი დგინდება. მაია ბითაძემ განმარტა, რომ რეგულირების საფასურის კონკრეტულ ოდენობებს კანონი განსაზღვრავს, გამონაკლისის სახით კი, 2016-2017 წლის თევზჭერის სეზონისთვის, რეგულირების საფასურის გადახდა, ერთჯერადად, სრული ოდენობით განხორციელდება.
