დარგობრივი ეკონომიკისა და ეკონომიკური პოლიტიკის კომიტეტის სხდომაზე დღეს სს „m2 უძრავი ქონების“ მიერ წარმოდგენილი საკანონმდებლო წინადადება „ქალაქის ტერიტორიაზე არსებული დაავადებული ნარგავების მოჭრის უფლებასთან დაკავშირებით“ განიხილეს. პროექტის მიხედვით, მესაკუთრეებს საკუთარ ტერიტორიაზე არსებული დაავადებული მწვანე ნარგავების მოჭრის უფლების მიღება კომპენსაციის გადახდის გარეშე შეეძლებათ.
დარგობრივი ეკონომიკისა და ეკონომიკური პოლიტიკის კომიტეტის თავმჯდომარის, რომან კაკულიას განცხადებით, საკითხის აქტუალობიდან გამომდინარე, უმჯობესი იქნება შეიქმნას სამუშაო ჯგუფი, რომელიც ფართო ჩართულობით, საჯაროდ იმსჯელებს წარმოდგენილ საკითხებზე და შესაბამის რეკომენდაციას შეიმუშავებს. მისივე თქმით, მხოლოდ ამის შემდეგ იქნება შესაძლებელი საკანონმდებლო ცვლილებებთან დაკავშირებით დოკუმენტის შემუშავება, რასაც კომიტეტმა ერთხმად დაუჭირა მხარი.
