ბათუმსა და ნახიჩევანს შორის პირდაპირი ავიარეისები დაინიშნება. აღნიშნულის შესახებ განცხადება აჭარის ავტონომიური რესპუბლიკის თავმჯდომარემ ზურაბ პატარაძემ ნახიჩევანის ავტონომიურ რესპუბლიკაში ვიზიტისას გააკეთა.
როგორც პატარაძემ განმარტა, ფრენების დაწყება 2017 წლის ზაფხულის სეზონისთვის იგეგმება.
ქართულ ავიაკომპანია Georgian Airways-ში განმარტავენ, რომ აღნიშნული მიმართულებით ფრენების დაწყების შესახებ ინფორმაციას ფლობენ და ბაზარსაც სწავლობენ. კომპანიაში აცხადებენ, რომ ბათუმსა და ნახიჩევანს შორის პირდაპირი ფრენების დაწყებაზე მოლაპარაკებებიც მიმდინარეობს, თუმცა კომპანიას ჯერჯერობით არ დაუთვლია აღნიშნული მიმართულება მათთვის რამდენად რენტაბელური იქნება.
ამ დროისათვის აზერბაიჯანსა და საქართველოს შორის ავიარეისებს - ბაქო-თბილისი მხოლოდ აზერბაიჯანული ავიაგადამზიდავი AZAL-ი ახორციელებს.
