ეს ყრილობა იქნება ყველაზე დემოკრატიული რაც კი აქამდე ჩატარებულა, - განაცხადა თბილისის საკრებულოს ფრაქცია ,,ნაციონალური მოძრაობა - თბილისის“ თავმჯდომარემ ირაკლი ნადირაძემ, რითაც გამოეხმაურა ენმ-ის იმ წევრებს, რომლებიც მიიჩნევენ, რომ პარტიის ყრილობა რიგი იურიდიული საკითხების გამო ლეგიტიმური ვერ იქნება.
„ეს ყრილობა იქნება ყველაზე დემოკრატიული რაც კი აქამდე ჩატარებულა. შესაბამისად ეს არის თითიდან გამოწოვილი თემა. თუ მათ რაიმე კითხვები ჰქონდათ აღნიშნულ საკითხებთან დაკავშირებით უნდა ჩართულიყვნენ საორგანიზაციო საბჭოს მუშაობაში და შენიშვნები უნდა წარმოედგინათ. ახლა ამ საკითხებზე აპელირება ხდება იმის გამო რომ მათ წინასწარ ეშინიათ იმ შედეგის რა შედეგიც დადგება ყრილობაზე,“-განაცხადა ნადირაძემ.
შეგახსენებთ, რომ დღეს გამართულ საგანგებო ბრიფინგზე ნიკა მელიამ განაცხადა, რომ პარტიის ის ლიდერები, რომლებიც ყრილობის ლეგიტიმურობას ეჭვქვეშ აყენებენ, ცდილობენ საბოტაჟი მოახდინონ.
