აჭარის ავტონომიური რესპუბლიკის სოფლის მეურნეობის სამინისტრომ 2017 წლისათვის შეიმუშავა ქვეპროგრამა „აგრარული ექსტენციის მიწოდება“ რომლის ბიუჯეტი განისაზღვრა 215 961 ლარით.
აგრარული ექსტენციის პროგრამის უმთავრესი მიზანი და ამოცანაა სოფლის მეურნეობის პროდუქციის მწარმოებელი ფერმერებისა და აგრომეწარმეების საქმიანობის ეფექტურობისა და მდგრადობის ამაღლება.
ექსტენციის ქვეპროგრამის ფარგლებში დაგეგმილია აჭარაში მოქმედი ფერმერული მეურნეობებისთვის და ინდივიდულური მწარმოებლებისთვის პირველად წარმოებასთან დაკავშირებული ექსტენციის სრული ციკლის მიწოდება დაწყებული ნიადაგის მომზადებით და დასრულებული მცენარეთა დაცვის ღონისძიებებით. მიმართულებების მიხედვით თითოეული მცენარეული კულტურის ექსტენცია მოიცავს 4-5 ფაზას (ნიადაგის მომზადება, თესვა, სხვლა, სასუქის შეტანა, მორწყვა და მცენარეთა დაცვა). თითოული ფაზის ფარგლებში ფერემერებს ჩაუტარდებათ როგორც თეორიული, ასევე პრაქტიკული კურსი. ექსტენციის პროგრამის ფარგლებში დაგეგმილია აგროტურების ორგანიზება და მონაწილე ფერმერების სხვადასხვა სახის ტექნიკური და აგროტექნოლოგიური ლიტერატურით უზრუნველყოფა.
აღნიშნულ ქვეპროგრამასთან დაკავშირებით დღეს, აჭარის სოფლის მეურნეობის სამინისტროში გაიმართა შეხვედრა. შეხვედრაზე სოფლის მეურნეობის დარგობრივი განყოფილების უფროსმა მამუკა თურმანიძემ წარმოადგინა პრეზენტაცია, ქვეპროგრამის განხორციელების დროით გეგმისა და შესასყიდი ექსტენციის მომსახურეობის შესახებ. შეხვედრას ესწრებოდა აჭარის სოფლის მეურნეობის მინისტრი ლაშა კომახიძე, სოფლის მეურნეობაში დასაქმებული არასამთავრობო ორგანიზაციებისა და სხვა კერძო სექტორის წარმომადგენლები.
