მალე საქართველოში „აბრეშუმის გზის საინფორმაციო ცენტრი“ გაიხსნება. პროექტს საქართველოს სავაჭრო-სამრეწველო პალატა და აბრეშუმის გზის საერთაშორისო ვაჭრობის პალატა (SRCIC) ერთობლივად ახორციელებენ. ამ საკითხზე ჩინეთის ქალაქ სიანში ორი პალატის ხელმძღვანელმა პირებმა - ნინო ჩიქოვანმა და ლუ იანზონგმა იმსჯელეს.
„აბრეშუმის გზის საინფორმაციო ცენტრის“ გახსნის იდეა ორ ქვეყანას შორის ეკონომიკური თანამშრომლობის გაღრმავების მიზნით გადაწყდა. პროექტში ჩართული მხარეები მიიჩნევენ, რომ ბოლო წლებში, ჩინეთსა და საქართველოს შორის ვაჭრობის კუთხით ურთიერთობა განსაკუთრებით გააქტიურდა, რასაც კიდევ უფრო შეუწყობს ხელს ჩინეთის პრეზიდენტის ინიციატივა „ერთი გზა-ერთი სარტყელი“ და თავისუფალი ვაჭრობის შესახებ შეთანხმება, რომელიც ძალაში მალე შევა.
პროექტის მიხედვით, საინფორმაციო ცენტრის ძირითადი საქმიანობა ორი ქვეყნის მეწარმეთათვის ექსპორტ-იმპორტის პოტენციალის გაცნობა და ამ კუთხით ხელის შეწყობა იქნება. ასევე საინფორმაციო ცენტრი აქტიურად იმუშავებს პოტენციური ბიზნეს-პარტნიორების ერთმანეთთან დაკავშირებაზე და პოტენციურ ინვესტორებს საინვესტიციო პროექტებს გააცნობს. ასევე ცენტრი იმუშავებს ქართული პროდუქციის ჩინეთში ექსპორტის ხელშეწყობაზე.
აბრეშუმის გზის საერთაშორისო ვაჭრობისა(SRCIC) და საქართველოს სავაჭრო-სამრეწველო პალატები ერთობლივად მიმდინარე წელს გაფორმებული მემორანდუმის ფარგლებში მუშაობენ. ამის გარდა, საქართველოს სავაჭრო სამრეწველო პალატის პრეზიდენტი-ნინო ჩიქოვანი SRCIC-ის ვიცე-პრეზიდენტია.
აბრეშუმის გზის საერთაშორისო პალატა 2015 წლის დეკემბერში ჰონგ-კონგის სპეციალურ ადმინისტრაციულ რეგიონში, საერთაშორისო სავაჭრო პალატის (ICC), მსოფლიო პალატების ფედერაციის (WCF) და აბრეშუმის გზის ქვეყნების სავაჭრო პალატების მიერ დაფუძნდა. მასში გაერთიანებულნი არიან 36 ქვეყნის უმსხვილესი კომპანიები. იგი ფოკუსირებულია “ერთი გზა ერთი სარტყელის” სტრატეგიასა და წევრი კომპანიების საჭიროებებზე. ჰქმნის საერთაშორისო და შიდა ეკონომიკისა და სავაჭრო თანამშრომლობის ახალ მოდელსა და ახალ პლატფორმას. საქართველოს სავაჭრო-სამრეწველო პალატა SRCIC-ს წევრი 2016 წლის აპრილში გახდა.
