პარლამენტის თავმჯდომარე ირაკლი კობახიძის განცხადებით, მომავალი წლის ბიუჯეტის პროექტის განხილვა საპარლამენტო უმრავლესობისა და უმცირესობის ფორმატებში გაგრძელდება. განცხადება კობახიძემ ბიუროს დღევანდელ სხდომაზე გააკეთა.
”ბიუჯეტის განხილვასთან დაკავშირებით მოგახსენებთ, რომ ჩვენ გვქონდა კონსულტაციები, მათ შორის საპარლამენტო ოპოზიციური პარტიების წარმომადგენლებთან, იყო გარკვეული სირთულეები პროცედურის კუთხით, მოგვიხდა გარკვეული ვადების და პროცედურის, გარკვეული ეტაპის გამოტოვება. ჩვენთვის მთავარია, რომ შინაარსობრივად აუცილებლად გავიაროთ ის ნაბიჯები, რომელიც გასავლელია. ჩვენი შემოთავაზება იქნება, რომ აუცილებლად შედგეს უმრავლესობა-უმცირესობის მიერ საკითხის განხილვა, ვიდრე საკითხს პლენარულ სხდომაზე გავიტანთ. ეს ჩვენი შემოთავაზებაა და ამასთან დაკავშირებით კიდევ გვექნება კონსულტაცია. ხუთშაბათს გვექნება ბიუროს სხდომა და საბოლოოდ შეგვიძლია შევათანხმოთ დეტალები. რომ არ გაგვეთვალისწინება ეს საფეხური, ფრაქცია, ამ შემთხვევაში პირდაპირ გვიწევდა პლენარულ სხდომაზე გატანა საკითხის და იქ პრაქტიკულად შეუძლებელია შენიშვნების და მოსაზრებების ასახვა ბიუჯეტში, ამის საშუალებას კი მოგვცემს ფორმატი, რომელზეც შეგვიძლია შევთანხმდეთ”, – განაცხადა ირაკლი კობახიძემ, რომლის ინფორმაციით,  საბოლოოდ, აღნიშნულ საკითხზე გადაწყვეტილება 8 დეკემბერს, ბიუროს სხდომაზე იქნება მიღებული.