სოჭელი ქალბატონი ქართველი მეგობრისთვის sms შეტყობინების გაგზავნისთვის გაასამართლეს. ინტერნეტ-პორტალ სოვას ინფორმაციით, რუსეთის მოქალაქემ ოკსანა სავასტიდიმ აგვისტოს ომამდე ცოტა ხნით ადრე ქართველ მეგობარს აცნობა, რომ აფხაზეთის მიმართულებით რუსული ტანკები მიემართებოდნენ, რაც მას სახელმწიფო ღალატში ჩაუთვალეს. განაჩენი სავასტიდის კრასნოდარის საოლქო სასამართლოს მოსამართლემ ვლადიმერ კობზევმა გამოუტანა, რომელმაც 2013 წელს ანალოგიური ბრალდებით კიდევ ერთი ქალბატონი ეკატერინე ხარებავა გაასამართლა. ჯაშუშობაში ბრალდებულ ხარებავას მან 6 წლით თავისუფლების აღკვეთა მიუსაჯა, თუმცა როგორც სააგენტო იტყობინება, ბრალდებული პატიმრობიდან აბაშიძე-კარასინის მოლაპარაკების შედეგად, ვადაზე ადრე გაათავისუფლეს. რაც შეეხება ოქსანა სავასტიდისს, სოვას ცნობით, ის მარტში გაასამართლეს, თუმცა ამის შესახებ ახლახანს გახდა ცნობილი.
