30 ნოემბრიდან 2 დეკემბრის ჩათვლით საქართველოში კორეის რესპუბლიკის ბიზნეს-დელეგაცია იმყოფება, რომელსაც სამხრეთ კორეის რესპუბლიკის საელჩოს კომერციული დეპარტამენტის გენერალური დირექტორის მოადგილე კიმ ხამინი ხელმძღვანელობს. დელეგაციის შემადგენლობაში 9 კომპანიის წარმომადგენლები არიან, რომელთა მიზანს ქართულ კომპანიებთან პარტნიორული ურთიერთობების დამყარება წარმოადგენს.
საქართველოს სავაჭრო-სამრეწველო პალატის ორგანიზებით 1 დეკემბერს სასტუმრო „Tbilisi Marriott“-ში, გაიმართა ქართული და კორეული საქმიანი წრეების წარმომადგენელთა შეხვედრა, სადაც მხარეებს საშუალება ჰქონდათ პირისპირ გაემართათ მოლაპარაკებები სამომავლო თანამშრომლობასთან დაკავშირებით.
ბიზნეს-ფორუმის ფარგლებში გაიმართა პრეზენტაციები, მათ შორის ,,Kotra’’-ს დელეგაციის მხრიდან. საკუთარი საქმიანობის შესახებ პრეზენტაციის ფორმატში საქართველოს სავაჭრო-სამრეწველო პალატისა და საინვესტიციო სააგენტოს წარმომადგენლებმა ისაუბრეს.
კორეის ბიზნეს- დელეგაციის წევრი კომპანიები რამდენიმე სფეროს წარმოადგენენ და მათი ინტერესები ქართულ კომპანიებთან მიმართებაშიც შესაბამისია.
9 კორეული კომპანია სამშენებლო მასალების, წლის გამათბობელი სისტემის, სტომატოლოგიური იმპლანტების, ავტონაწილებისა და კოსმეტიკის წარმოების სფეროს წარმოადგენს. ასევე მათი ინტერესის სფეროა ფარმაცევტიკა და ნარჩენების გადამუშავება. ბიზნეს-ფორუმში მონაწილეობა 60-მდე ქართული კომპანიის წარმომადგენელმა მიიღო. ორივე მხრიდან მაღალი იყო დაინტერესება საქართველოს სავაჭრო-სამრეწველო პალატის მიერ ორგანიზებულ ბიზნესის ორმხრივ შეხვედრებში მონაწილეობის მიღებაზე.
