თურქეთი მოელის, რომ ბაქო-თბილისი-ყარსის სარკინიგზო მაგისტრალი ექსპლუატაციაში 2017 წლის დასაწყისიდან შევა. განცხადება აღნიშნულის შესახებ თურქეთის ტრანსპორტისა და კომუნიკაციების მინისტრმა ახმეტ არსლანმა აზერბაიჯანულ სააგენტო „ტრენდთან“ საუბრისას გააკეთა.
მინისტრის განამარტებით, მეორე ხაზი ექსპლუატაციაში მომდევნო წლის ბოლომდე შევა.
„ბაქო-თბილისი-ყარსის პროექტი რეალიზაციის ბოლო ეტაპზე იმყოფება. 2017 წლის დასაწყისიდან პირველი ხაზი ამოქმედდება, რომელიც დიზელის ლოკომოტივებისთვის იქნება განკუთვნილი“, განაცხადა მინისტრმა.
არსლანმა აღნიშნა, რომ ბაქო-თბილისი-ყარსის პროექტი მნიშვნელოვანია, როგორც აზერბაიჯანისთვის ასევე თურქეთისათვის.
ის აცხადებს, რომ ამ პროექტის წყალობით, ტვირთები აზერბაიჯანიდან ევროპაში თურქეთის გავლით მოხვდება. ასევე ევროპული ტვირთები შუა აზიასა და ჩინეთში ჩვენი ქვეყნების მეშვეობით იქნება გატარებული.
«პროექტს საჭიროებენ ასევე სხვა ქვეყნები, როგორებიცაა ჩინეთი, ყაზახეთი, თურქმენეთი, საქართველო და მლიანად ევროპა“, განმარტა არსლანმა.
უნდა აღინიშნოს, რომ ამ დროისათვის სამშენებლო სამუშაოები სარკინიგზო მაგისტრალის თურქულ მხარეს მიმდინარეობს.
აღსანიშნავია, რომ ბაქო-თბილისი-ყარსის რკინიგზის მშენებლობა 2007 წელს დაიწყო და პირველადი გეგმის მიხედვით სამ წელიწადში უნდა დასრულებულიყო. თუმცა როგორც ირკვევა ის 2017 წლამდე არ გაიხსნება. პროექტის მიხედვით, სარკინიგზო მაგისტრალის სიგრძე 826 კილომეტრია. აქედან საქართველოს ტერიტორიაზე, 254 კილომეტრი გაივლის.
