საქართველოს ხელისუფლებას ამბიციური გეგმები აქვს, რისთვისაც საქართველოს პარლამენტში მყარი უმრავლესობის ქონა აუცილებელია, - განაცხადა საქართველოს პარლამენტის თავმჯდომარემ, ირაკლი კობახიძემ რუსთავი 2-ის საქმესთან დაკავშირებით, გადაცემა არჩევანში

მისი  თქმით, „ქართულმა ოცნებამ“ გასული ოთხი წლის განმავლობაში თავისი მუშაობით დაამტკიცა, რომ უმრავლესობაში ყოფნას, მხოლოდ პოზიტიური მიზნებისთვის იყენებს.

 „ჩვენ გვაქვს დიდი გეგმები. განსაკუთრებით გამოვყოფ ეკონომიკური განვითარების მიმართულებას, რასაც სჭირდება პარლამენტის სტაბილური მუშაობა; კონკრეტული გეგმებია სოციალური განვითარების მიმართულებით; დემოკრატიული განვითარების კუთხით გვაქვს ძალიან მნიშვნელოვანი ამოცანები; საგარეო პოლიტიკური კურსის სიმყარისთვის ძალიან მნიშვნელოვანია ის, რომ „ქართულ ოცნებას“ ჰქონდეს მყარი უმრავლესობა, რათა დასავლური კურსი ევროინტეგრაციის და ევროატლანტიკური მიმართულებით იყოს მაქსიმალურად სტაბილურად უზრუნველყოფილი“, - აღნიშნავს კობახიძე.

 „ჩვენ გვაქვს ამბიცია იმისა, რომ დემოკრატიის მიმართულებით მიღწეულზე არ გავჩერდეთ და საქართველოში დემოკრატიული პროცესები კიდევ უფრო განვავითაროთ“, - აცხადებს ირაკლი კობახიძე.