აჭარის უმაღლესი საბჭოს თავმჯდომარედ დავით გაბაიძე აირჩიეს.
"ყველაფერს გავაკეთებ, რომ დარწმუნდეთ თქვენი არჩევანის მართებულობაში. მოვუწოდებ ყველა პოლიტიკურ სუბიექტს, ყოველგვარი პოლიტიკური კეკლუცობის გარეშე, კონსტრუქციული თანამშრომლობისკენ", - განაცხადა გავით გაბაიძემ.
დავით გაბაიძეს ფარული კენჭისყრით 14 დეპუტატმა დაუჭირა მხარი. კენჭისყრაში მონაწილეობა არ მიიღო "ნაციონალურმა მოძრაობამ" და ნინო ბურჯანაძის პარტიის ერთმა წევრმა.
რაც შეეხება "პატრიოტთა ალიანსს", დავით თარხან-მოურავი სხდომას არ ესწრებოდა.
დავით გაბაიძე, პროფესიით იურისტი (ი. ჯავახიშვილის იურიდიული ფაკულტეტის დოქტორანტი) გახლავთ აჭარის სავაჭრო სამრეწველო პალატის მედიაციის ცენტრის მედიატორი; იყო შპს "ბათუმის მუდმივმოქმედი არბიტრაჟი“-ს არბიტრი და სსიპ საქართველოს ადვოკატთა ასოციაციის წევრი. 2012 წლიდან მუშაობდა აჭარის ავტონომიური რესპუბლიკის მთავრობის აპარატის იურიდიული და ადამიანური რესურსების მართვის დეპარტამენტის ჯერ მოადგილედ, შემდეგ უფროსად. იყო აჭარის ფინანსთა და ეკონომიკის სამინისტროს იურიდიული დეპარტამენტის მთავარი სპეციალისტი (2006-2007), სსიპ „ბათუმის ზღვისპირა პარკი“ იურიდიული განყოფილების უფროსი (2005-2006), წარმატებულად ეწეოდა იურიდიულ საქმიანობას სხვადასხვა კერძო კომპანიებში. 2013 წელს ჩააბარა მოსამართლის საკვალიფიკაციო გამოცდა - სამოქალაქო და ადმინისტრაციული სამართლის სპეციალიზაციით; 2005 წელს ჩააბარა მოსამართლეობის საკვალიფიკაციო გამოცდა – საერთო სპეციალიზაციით; 2004 - ადვოკატთა საკვალიფიკაციო გამოცდა – საერთო სპეციალიზაციით. 22 წლის ასაკიდან ასწავლის სხვადასხვა უნივერსიტეტში, მათ შორის ბათუმის სახელმწიფო უნივერსიტეტში, ბათუმის უმაღლეს საფინანსო სკოლასა და გრ. რობაქიძის უნივერსიტეტში. არის სამეცნიერო სტატიების ავტორი
