პრეზიდენტმა გიორგი მარგველაშვილმა პრემიერ-მინისტრად გიორგი კვირიკაშვილის დანიშვნის შესახებ განკარგულება გამოსცა. განკარგულებას პრეზიდენტის ადმინისტრაცია ავრცელებს.
”საქართველოს კონსტიტუციის მე-80 მუხლის მე-8 პუნქტის შესაბამისად, საქართველოს პრემიერ-მინისტრად დაინიშნოს გიორგი კვირიკაშვილი”, - ნათქვამია პრეზიდენტის განკარგულებაში.
საქართველოს პარლამენტმა მთავრობის ახალ შემადგენლობას კენჭი გუშინ უყარა და მინისტრთა კაბინეტი დაამტკიცა.
ქვეყნის ახალ მთავრობას მხარი პარლამენტის 101-მა დეპუტატმა დაუჭირა, ხოლო წინააღდეგ 19 დეპუტატი წავიდა.
მთავრობის შემადგენლობისთვის ნდობის გამოცხადების შესახებ პარლამენტის დადგენილება პრეზიდენტის ადმინისტრაციას გუშინვე გადაეგზავნა.
კონსტიტუციის თანახმად, საქართველოს მთავრობის შემადგენლობისთვის ნდობის გამოცხადებიდან ორი დღის ვადაში პრეზიდენტი ნიშნავს საქართველოს პრემიერ-მინისტრს, ხოლო პრემიერ-მინისტრი ორი დღის ვადაში საქართველოს მთავრობის სხვა წევრებს ნიშნავს.
