ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის კანდიდატად წარდგენილი ვიქტორ დოლიძე ე.წ. კაბელების საქმესთან დაკავშირებით კომენტარს აღარ აკეთებს.
კითხვაზე, როგორ შეაფასებს გიორგი კვირიკაშვილის განცხადებას, დოლიძემ აღნიშნა, რომ ამ თემაზე კომენტარს არ გააკეთებს.
გიორგი კვირიკაშვილის შეფასებით, ვიქტორ დოლიძის მიერ „კაბელების საქმესთან“ დაკავშირებით გაკეთებული განცხადება „ძალიან შორს იყო სიმართლისგან“.
,,მე ვფიქრობ, რომ არავინ სთხოვს მას დღეს პროკურატურის პოზიციის დაცვას, მაგრამ მინიმუმ მეორე მხარეს არ უნდა გააკეთოს კომენტარები. მით უმეტეს, რომ ამ კომენტარს არაფერი სიმართლესთან საერთო არ გააჩნია. ჩვენ ვენდობით იმ ინსტიტუციებს, რომლებიც დღეს ქვეყანაში მოქმედებენ და მათი გადაწყვეტლებები არავითარ შემთხვევაში არ ატარებს პოლიტიკურ ხასიათს. არც დღეს ატარებს და არც გასული 4 წლის განმავლობაში, არც ერთ მომენტში ეს ასე არ ყოფილა. ამიტომ ვფიქრობ, რომ ეს განცხადება იყო ძალიან შორს სიმართლისგან. ვფიქრობ, ვიქტორს ემოციური განცხადება მოუვიდა“, - განაცხადა კვირიკაშვილმა.
ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრობის კანდიდატმა ვიქტორ დოლიძემ გუშინ განაცხადა, რომ „კაბელების საქმეზე“ პირების დაპატიმრება იყო ყოფილი პრემიერის პერიოდში მიღებული პოლიტიკური გადაწყვეტილება.
