აჭარაში სერვისის გაუმჯობესების მიზნით ტურიზმის სექტორში დასაქმებული კადრების გადამზადება გრძელდება. ამჯერად, აჭარის ტურიზმის დეპარტამენტში ტრენინგები სასტუმროს ადმინისტრატორებს, რეზერვაციის სამსახურის მენეჯერებსა და მიმღების თანამშრომლებს უტარდებათ. თბილისიდან მოწვეული ტრენერი დავით ჭავჭანიძე, რომელსაც სასტუმრო ბიზნესში მუშაობის 20 წლიანი გამოცდილება აქვს, მონაწილეებს 4 დღის განმავლობაში სასტუმროს განყოფილებების ფუნქციონირებისა და მომსახურების ხარისხის გაუმჯობესების შესახებ თავის გამოცდილებას უზიარებს.
ნოემბრის განმავლობაში სასტურმოს მიმღები განყოფილების თანამშრომლების გარდა ტრენინგები კვების ობიექტების საშუალო რგოლის მენეჯერებსა და დასუფთავების სამსახურის თანამშრომლებს უტარდებოდათ. სულ, თვის განმავლობაში 75 ადამიანის გადამზადება მიმდინარეობდა.
“აჭარის ტურიზმის დეპარტამენტმა 2016 წელს მთლიანობაში ტურიზმის სექტორში დასაქმებული 400-მდე ადამიანი გადაამზადა. დეპარტამენტის სატრენინგო-საკონსულტაციო ცენტრში სასტუმროებისა და რესტორნების თანამშრომლებს ტრენინგები და კონსულტაციები ისეთი მნიშვნელოვანი საკითხების შესახებ უტარდებოდათ, როგორებიცაა სტუმრის მომსახურების, დასუფთავების, უსაფრთხოების, რეზერვაციისა და ხარისხის ამაღლების საერთაშორისო სტანდარტები. ჩვენი ცენტრი აჭარის ტურიზმისა და კურორტების დეპარტამენტის ბაზაზე მიმდინარე წლიდან ფუნქციონირებს და ჩვენს მიერ შეთავაზებული ტრენინგები თუ კონსულტაციები სრულიად უფასოდაა ხელმისაწვდომი კერძო სექტორის წარმომადგენლებისთვის. ჩვენ შემდეგ წელსაც გავაგრძელებთ ტურიზმის სექტორშო დასაქმებული კადრების გადამზადებას, რაც საბოლოო ჯამში ვფქირობთ გავლენას იქონიებს რეგიონში სერვისის გაუმჯობესებაზე,“ განაცხადა აჭარის ტურიზმის დეპარტამენტის სერვისის განვითარების განყოფილების უფროსმა თამარ კაიკაციშვილმა.
