შს მინისტრის მოვალეობის შემსრულებლის გიორგი მღებრიშვილის ინფორმაციით, გიგა ოთხოზორიას მკვლელზე ინტერპოლი უახლოეს მომავალში წითელი ცირკულარით ძებნას დაიწყებს. გიორგი მღებრიშვილის განცხადებით, შესაბამისი მიმართვა ინტერპოლში უკვე გაგზავნილია - ”ეს ტერიტორია რომ უკონტროლოა, ახალი არ არის თქვენთვის. მიმდინარეობს ამ მიმართულებით პროცედურები და შედეგებს დაველოდოთ”, - მიმართა მღებრიშვილმა დეპუტატებს.
შეგახსენებთ, რომ გიგა ოთხოზორია ხურჩაში 19 მაისს, ე.წ. სასაზღვრო გამშვებ პუნქტთან მოკლეს. სამეგრელო-ზემო სვანეთის საოლქო პროკურატურამ ოთხოზორიას განზრახ მკვლელობის ფაქტზე, რაშიდ კანჯიოღლის მიმართ ბრალდების შესახებ დადგენილება გამოიტანა და სისხლის სამართლებრივი დევნა დაიწყო. კანჯიოღლი ამჟამად დაკავებული არ არის.
