საქართველოს სომელიეთა ასოციაციისა და თბილისის ღვინის სკოლის ერთობლივი კამპანია „გახდი სომელიე“ იწყება. ამასთან დაკავშირებით, 24 ნოემბერს, 12.00 საათზე ბარ-რესტორან “ლოლიტა“-ში, (ჭოველიძის N 7) საქართველოს სომელიეთა ასოციაციის პრეზიდენტი შალვა ხეცურიანი, ღვინის ეროვნული სააგენტოს თავმჯდომარე გიორგი სამანიშვილი და ტურიზმის ეროვნული ადმინისტრაციის ხელმძღვანელი გიორგი ჩოგოვაძე ერთობლივ პრეს-კონფერენციას გამართავენ.
სომელიეს სერტიფიცირებული კურსების მსმენელები არიან HoReCa-ს (სასტუმრო, რესტორანი, კაფე) და ტურიზმის სექტორში მომუშავეები, ღვინის ბიზნესის დაწყების მსურველები და ასევე ღვინის სექტორში დასაქმებულები, თუ მოყვარულები.
განახლებული პროგრამა 6 თვეს გასტანს. ლექციები ჩატარდება ქართულ და ინგლისურ ენებზე.
მსმენელებს, ვინც წარმატებით ჩააბარებს საქართველოს სომელიეთა ასოციაციის (GSA) ეროვნულ და WSET-ის შესაბამისი დონის საერთაშორისო გამოცდებს, ოფიციალურად მიენიჭებათ “სომელიე”-ს ან “ასისტენტ სომელიე”-ს სტატუსი, აღიარებული საქართველოს სომელიეთა ასოციაციის მიერ, რომელიც საერთაშორისო სომელიეთა ასოციაციის (Association de la Sommellerie Internationale (A.S.I.) წევრია 2014 წლიდან.
საქართველოს სომელიეთა ასოციაცია ღვინის განათლების მსოფლიო ლიდერის ორგანიზაცია WSET-ის ოფიციალური პროვაიდერია საქართველოში.
კამპანია „გახდი სომელიე“ უკვე მეორედ ტარდება. 2015 წელს სომელიეს სერტიფიცირებული კურსი 80-მა მსმენელმა გაიარა, რომელთაგან 21-მა „სომელიეს“ ან „ასისტენტ სომელიეს“ სტატუსი მიიღო.
თბილისის ღვინის სკოლის მხარდამჭერები არიან საქართველოს სოფლის მეურნეობის სამინისტროს ღვინის ეროვნული სააგენტო, ტურიზმის ეროვნული ადმინისტრაცია, “აჭარა ჯგუფი” და სასტუმრო „რუმსი“.
