მე-9 მოწვევის პარლამენტის ბიუროს პირველი სხდომა 21 ნოემბერს გაიმართება. წინასწარი ინფორმაციით, სწორედ ხვალინდელ ბიუროზე იმსჯელებენ ახალი მთავრობის ფორმირებასთან დაკავშირებულ საკითხებზე.
როგორც ჟურნალისტებს პარლამენტის პირველმა ვიცე-სპიკერმა თამარ ჩუგოშვილმა განუცხადა, მთავრობისთვის ნდობის გამოცხადების საკითხის კომიტეტებსა და უმრავლესობა-უმცირესობის ფორმატში განხილვა მომავალი კვირის განმავლობაში იგეგმება.
„ყველას ინტერესშია, რომ მთავრობა რაც შეიძლება სწრაფად დამტკიცდეს, რათა შეძლოს საკუთარი საქმიანობის ეფექტურად განხორციელება, მას ამაში ხელი არ შეეშალოს, თუმცა, ასევე ძალიან მნიშვნელოვანია, რომ პარლამენტის კომიტეტებს და უმრავლეობასა და უმცირესობას ჰქონდეთ საშუალება, დეტალურად განიხილონ სამთავრობო პროგრამა, მინისტრობის კანდიდატებს დაუსვან კითხვები და მიიღონ კითხვებზე პასუხები. ვეცდებით, მთავრობის ფორმირების პროცესი ძალიან არ გაიწელოს, თუმცა, არ უნდა დავაზიანოთ საპარლამენტო განხილვების პროცესი“, - აღნიშნა თამარ ჩუგოშვილმა.
