საპარტნიორო ფონდს აშშ-ის მთავრობის განვითარების საფინანსო ინსტიტუტის -„უცხოეთის კერძო საინვესტიციო კორპორაციის“ (OPIC) მმართველი დირექტორი მცირე და საშუალო ბიზნესის ფინანსური დარგში ქენეთ ანჯელი ეწვია.
საპარტნიორო ფონდში გამართული შეხვედრა აშშ-ის მთავრობის განვითარების საფინანსო ინსტიტუტთან (OPIC) გაფორმებული მემორანდუმის ფარგლებში შედგა, რომელიც
აშშ-სა და საქართველოს შორის თანამშრომლობის ფორმატში სხვადასხვა პროექტების განხორციელებისთვის მხარეების შესაბამისი რესურსების და შესაძლებლობების გამოყენებას გულისხმობს.
საპარტნიორო ფონდი აშშ-ის მთავრობის განვითარების საფინანსო ინსტიტუტთან, „უცხოეთის კერძო საინვესტიციო კორპორაციასთან“ (OPIC) კონკრეტული პროექტებისა და პირდაპირი კერძო ინვესტიციების რისკების გადაზღვევის ინოვაციურ მეთოდებზე მუშაობს, რაც საერთაშორისო რეიტინგის გაუმჯობესებისა და აშშ-ის ფინანსურ ბაზრებზე იაფ ფულად რესურსზე წვდომის შესაძლებლობას იძლევა.
ამერიკული ინვესტიციების მოზიდვისა და ფინანსურ ინსტრუმენტებზე წვდომის გაზრდის მიზნით საპარტნიორო ფონდის დელეგაცია აშშ-ის მთავრობის განვითარების საფინანსო ინსტიტუტის, „უცხოეთის კერძო საინვესტიციო კორპორაციასთან“ (OPIC) მიწვევით ამა წლის სექტემბერში აშშ-ში იმყოფებოდა. საქმიანი ვიზიტის ფარგლებში საპარტნიორო ფონდის აღმასრულებელმა დირექტორმა დავით საგანელიძემ და ფონდის კონსულტანტმა მირიან გოგიაშვილმა ამერიკის საფინანსო წრეების წარმომადგენლებთან საქმიანი შეხვედრები გამართეს.
საპარტნიორო ფონდსა და აშშ-ის მთავრობის განვითარების საფინანსო ინსტიტუტთან - „უცხოეთის კერძო საინვესტიციო კორპორაციასთან“ (OPIC) ურთიერთთანამშრომლობის მემორანდუმი ამა წლის გაზაფხულზე გაფორმდა. მემორანდუმის ფარგლებში საპარტნიორო ფონდი და OPIC -ი ერთობლივად მოახდენენ სხვადასხვა კომერციულად საინტერესო პროექტების შესწავლას და შესაბამისი გადაწყვეტილების შემთხვევაში, მზად არიან ერთობლივად დააფინანსონ ისინი. მხარეებს სურთ ჩამოაყალიბონ გრძელვადიანი თანამშრომლობის ზოგადი პრინციპები, რომელიც ხელს შეუწყობს სხვადასხვა სფეროებში პროექტების განხორციელებას.
ამ ეტაპზე, ფონდი და აშშ-ის მთავრობის „უცხოეთის კერძო საინვესტიციო კორპორაცია“ (OPIC) აქტიურად თანამშრომლობენ რამდენიმე პროექტის ფარგლებში, მათ შორისაა სასტუმრო “რედისონ წინანდლის” პროექტი, რომელსაც ფონდი Silk Road Group-თან ერთად ახორციელებს. ამჟამად, მიმდინარეობს სასტუმროს მშენებლობა, რომლის დასრულებაც 2017 წელს იგეგმება.
