2016 წლის 12 ნოემბერს, ფინანსთა მინისტრი ნოდარ ხადური დაესწრო ფინანსთა სამინისტროს მომსახურების სააგენტოს ცხრა თვის ანგარიშის პრეზენტაციას, რომელიც სააგენტოს გენერალურმა დირექტორმა, გიორგი ხანიშვილმა წარადგინა.
იანვარ-სექტემბრის პერიოდში, სააგენტოს შემოსავლებმა 5 230 776 ლარი შეადგინა, რაც გასული წლის მაჩვენებელს 29%-ით აღემატება. მომსახურების სააგენტოს შემოსავლების 11%-იანი ზრდა ჰქონდა დაგეგმილი, თუმცა აღნიშნული მაჩვენებელი აქტიური მუშაობისა და სტრუქტურული რეორგანიზაციის შედეგად იქნა მიღწეული. შედეგად, ბიუჯეტში დამატებით გადაირიცხა 800 000 ლარზე მეტი.
ამასთანავე, შემოსავლების მნიშვნელოვანი ზრდა აღინიშნება შემდეგი მიმართულებებითაც: ვებგვერდის (www.eauction.ge) მომსახურება - 32,2%, საქონლის რეალიზაცია - 29,8%.
აღსანიშნავია, რომ მომსახურების სააგენტომ საანგარიშო პერიოდში შეიმუშავა და დანერგა ახალი პროდუქტები. 2016 წლიდან გამარტივდა ტექნოლოგიური პროცედურები. კერძოდ, „ერთი ფანჯრის“ პრინციპით მიმდინარეობს ქონების მიღების, დასაწყობების და შეფასების პროცედურები, შეიცვალა სასაწყობო მეურნეობის მართვის სისტემა, შემოსავლების სამსახურთან ერთად, დაინერგა რეალიზებული მერქნული რესურსის გადაადგილების ერთიანი მონიტორინგის სისტემა, რამაც მნიშვნელოვნად შეამცირა სამართალდარღვევათა შესაძლებლობა ამ მიმართულებით.
ასევე, დაიხვეწა ელექტრონული აუქციონის სისტემა, რომელიც როგორც მომხმარებლებს, ისე ვებგვერდის ადმინისტრატორებს უმარტივებს პორტალზე ნავიგაციას.
ესტონეთის მთავრობის მხარდაჭერით, განხორციელდა პროექტი: „საქართველოში არსებული საჯარო სერვისების ხარისხისა და მომხმარებელზე ორიენტირებული სერვისის გაუმჯობესება“. აღნიშნულ პროექტში სააგენტოს ორი მიმართულება ჩაერთო: ელექტრონული აუქციონის მობილური აპლიკაცია და მკაცრი აღრიცხვის დოკუმენტების ელექტრონული რეგისტრაცია.
შეხვედრაზე, ასევე, განიხილეს სააგენტოს სამომავლო განვითარების გეგმები და მნიშვნელოვანი პროექტები.
პრეზენტაციას დაესწრნენ ფინანსთა სამინისტროს სათათბირო საბჭოს წევრები, ფინანსთა სამინისტროს მომსახურების სააგენტოს თანამშრომლები.
