ეროვნული ბანკის პრეზიდენტი კობა გვენეტაძე ლარის კურსთან დაკავშირებით საუბრობს და აცხადებს, რომ საშუალოვადიან და გრძელვადიან პერიოდში ქართულ ვალუტას ექნება გამყარების მიმართულება.
,,ლარის კურსზე მოქმედებს სხვადასხვა გარიგებები, სხვადასხვა მოლოდინები და ეს ყველაფერი არის ერთად ასახული, ანუ იქნება გაუფასურებები, გამყარებები, მაგრამ საშუალოვადიან და გრძელვადიან პერიოდში ვფიქრობ, რომ ჩვენ ვალუტას ექნება გამყარების მიმართულება“, - განაცხადა სებ-ის პრეზიდენტმა.
მისივე თქმით, ეროვნული ბანკი არასდროს არ დუმს და როცა საჭიროა, ყოველთვის აკეთებს განცხადებებს.
„ინტერვენციებთან დაკავშირებით, ვფიქრობ, რომ საკმაოდ ნათელი მაგალითი გავეცით და განცხადებაც გავაკეთეთ. მინდა, ისიც აღვნიშნო, რომ ეროვნული ბანკი არ დუმს და ყოველთვის აკეთებს განცხადებებს, როდესაც საჭიროა. ასევე, იყო მსხვილი და ერთჯერადი ტრანზაქციები, ჩვენ გავაკეთეთ ეს ინტერვენციები, ეს არის ეროვნული ბანკის სტრატეგიაში, ეს არის ის, რაც ადრეც ძალიან ბევრჯერ გაუკეთებია ეროვნულ ბანკს - 2012, 2013, 2014, 2015 წლებში და გაცილებით უფრო მეტი მოცულობით, ვიდრე ახლა გაკეთდა. ეს იყო აბსოლუტურად შესაბამისობაში იმ პოლიტიკასთან, რომელსაც ეროვნული ბანკი ატარებს. არ არის გამორიცხული, რომ მომავალში, როდესაც საჭირო იქნება, ამის გამოყენება მოუხდეს ეროვნულ ბანკს“, - განაცხადა გვენეტაძემ.
მისივე თქმით, წლის განმავლობაში ეროვნულმა ბანკმა არა მარტო გაყიდვები გააკეთა, საკმაოდ დიდი შესყიდვებიც ჰქონდა და ეს ყველას ყურადღების მიღმა რჩება.
რაც შეეხება იმას, რამდენად აქვს რეფინანსირების გაზრდილ სესხებს გავლენა კურსის ცვლილებაზე, კობა გვენეტაძის თქმით, ეს არის ლიკვიდობის მართვის ერთ-ერთი ინსტრუმენტი, რომელსაც ყველა პროგრესული პოლიტიკის გამტარებელი ეროვნული ბანკი იყენებს და ეს არ ახდენს გავლენას გაცვლით კურსზე.
