„ნაციონალური მოძრაობის“ წევრი რომან გოცირიძე „ფეისბუქის“ საკუთარ გვერდზე ლარის კურსის გაუფასურების საკითხს ეხმაურება.
„როცა 1998 წელს ლარის დევალვაცია მოხდა, პარლამენტის საბიუჯეტო ოფისში გამოვეცით ნაშრომი: ”ლარის დევალვაციის მიზეზები და მოსალოდნელი შედეგები”, სადაც ჩამოთვლილი იყო ასამდე ფაქტორი, რომელიც გავლენას ახდენს გაცვლის კურსზე.
ჩვენმა მთავრობამ პრიმიტიულ დონემდე გაამარტივა იგი და დგანან პირდაღებულები და ვერ აუხსნიათ, თუ რა ხდება: ტურისტებმა ცოტა იმატა? იმატა! ცოტა მეტი გადმოგვირიცხეს ფული ემიგრანტებმა? გადმოგვირიცხეს! ცოტა ის და ცოტა ეს, ხომ? ხომ! მერე რა ჯანდაბა მოსდის ამ ლარს?!
შელოცვებს რომ არ აკლებენ, ამასაც ვხედავთ. ცხვარიც დაკლული რომ ექნებათ, ამაში ერთი წამითაც არ მეპარება ეჭვი! მაშინ რა მოსდის? მოსდის ის, რომ საქართველოს მართავენ ნაქართუბანკალი საშუალოსნები და სხვა მისთანანი, რომლებსაც ნორმალურ ვითარებაში განყოფილების უფროსის პოზიციაზე მაღლა არავინ დანიშნავდა.
რომელიმე თქვენგანი ანდობდით რომელიმე მინისტრს საკუთარ ფულს სამართავად? ქვეყანა კი ვანდეთ“, - წერს რომან გოცირიძე.
