საქართველოს ეკონომიკის მინისტრი დიმიტრი ქუმსიშვილი მიიჩნევს, რომ თავისუფალ ინდუსტრიულ ზონებს საქართველოში კარგი პერსპექტივა აქვს.
"თავისუფალ ინდუსტრიულ ზონებს საქართველოში აქვს ძალიან კარგი პერსპექტივა, რაც კიდევ უფრო გამყარდა ჩინეთთან თავისუფალ ვაჭრობაზე მოლაპარაკებების დასრულების შემდეგ. საქართველო დღეს არის უნიკალურ მდებარეობაზე უნიკალური შესაძლებლობებით. ეს არის ქვეყანა, რომელსაც აქვს წვდომა როგორც ევროპის, ასევე ჩინეთის ბაზარზე, საკმაოდ კარგი ლოჯისტიკით. აქედან გამომდინარე, ინდუსტრიის განვითარება და მის ფარგლებში ინვესტიციების მოზიდვა იქნება წარმატებული“- აღნიშნა ქუმსიშვილმა.
შეგახსნებთ, რომ დიმიტრი ქუმსიშვილმა დღეს ჟურნალისტებთან საუბრისას განაცხადა, რომ ფოთის თავისუფალი ინდუსტრიული ზონის (თიზ) გასხვისებაზე ახალ ინვესტორთან მიმდინარეობს მოლაპარაკებები. მსხვილი ინდუსტრიული ჯგუფის დასახელება სავარაუდოდ, 60 დღეში იქნება შესაძლებელი.
“სახელმწიფო უკვე მუშაობს მსხვილ ინდუსტრიულ ჯგუფთან, თუ ჩვენ წარმატებით დავასრულეთ აღნიშნული მოლაპარაკებები $ 600 მილიონიან ინვესტიციებზე იქნება საუბარი თავისუფალ ინდუსტრიულ ზონაში,” – აცხადებს მინისტრი და განმარტავს, რომ არაბული ჯგუფი “რაკია” საქართველოში რჩება და ინვესტირებას განაგრძობს “შერატონში”, თბილისი მოლში.
“თავის დროზე რას ალ ხაიამას ხელისუფლება იყო ფოთის პორტის მფლობელი, რომელიც შემდეგ გაყიდეს. თავისუფალი ინდუსტრიული ზონა და ფოთის აეროპორტი იყო შემადგენელი ერთი კლასტერული ხედვის, რაც გააჩნდა რას ალ ხაიამს საინვესტიციო ხელისუფლებას. მას შემდეგ რაც პორტი გაიყიდა, ის ინვესტიციები, რაც უნდა ჩადებულიყო თიზ-ში და აეროპორტში აღარ განხორციელდა”, – განაცხადა ქუმსიშვილმა.
მინისტრი ამბობს, რომ აქედან გამომდინარე სახელმწიფო 100-150 მლნ დოლარის ღირებულების ქონებას იბრუნებს.
