ბათუმის მუნიციპალიტეტის მიერ მიმდინარე წლის 27 სექტემბერს ბიუჯეტში განხორციელებული ცვლილებები სრულ შესაბამისობაშია საქართველოს კანონმდებლობასთან, აღნიშნულის შესახებ განცხადება ბათუმის მერიის საფინანსო ეკონომიკური სამსახურის უფროისის მოადგილემ არჩილ ვანაძემ სასამართლოს მიერ მიღებული გადაწყვეტილებასთან დაკავშირებით გააკეთა, რომლის სარჩელის ავტორიც საია-ა.
„კერძოდ, სასამართლომ არ გაიზიარა საქართველოს ახალგაზრდა იურისტთა ასოციაციის სარჩელი იმასთან დაკავშირებით, რომ ადგილი ჰქონდა საქართველოს საარჩევნო კოდექსის მოთხოვნათა დარღვევას და ბიუჯეტში ცვლილებები მიმართული იყო ამომრჩეველთა ნებაზე ზეგავლენის მოსახდენად. მუნიციპალურ ბიუჯეტში ცვლილებები ქალაქის ინფრასტრუქტურისთვის სტიქიის შედეგად მიყენებული ზიანის სალიკვიდაციო სამუშაოების უზრუნველყოფის მიზნით განხორციელდა. ამასთან, აღნიშნული სამუშაოებით ასევე მოხდება მოსალოდნელი სტიქიური მოვლენების ლიკვიდაცია და თავიდან აცილება, ვინაიდან შემოდგომისა და მომავალი ზამთრის სეზონზე მოსალოდნელი ნალექების ინტენსივობა ზრდის სტიქიური მოვლენების რისკებს. კიდევ ერთხელ განვმარტავთ, რომ ქ. ბათუმის მუნიციპალიტეტის მერიის მიერ განხორცილებული ქმედებები სრულ შესაბამისობაში იყო საქართველოს საარჩევნო კოდექსის მოთხოვნებთან. შესყიდვების დროულად განხორცილების მიზნით, სატენდერო პროცედურები უკვე დაწყებულია. შესაბამისად, უახლოეს პერიოდში იგეგმება უშუალოდ სარეაბილიტაციო და აღდგენითი სამუშოების დაწყება”, აცხადებს ვანაძე.
