სასტუმრო “Rooms Hotel Tbilisi”-ში ოცდაცამეტმა არასამთავრობო და სათემო ორგანიზაციამ სამწლიანი მუშაობის შედეგები გლობალური გარემოსდაცვითი ფონდის (GEF) მცირე გრანტების პროგრამის ფარგლებში წარადგინა, რომელიც გარემოსა და ბუნებრივი რესურსების დაცვის სამინისტროსა და გაეროს განვითარების პროგრამის (UNDP) ხელშეწყობით ხორციელდება.
გარემოსა და ბუნებრივი რესურსების დაცვის მინისტრი გიგლა აგულაშვილი, გაეროს განვითარების პროგრამის (UNDP) ხელმძღვანელის მოადგილესთან შომბი შარპთან და მცირე გრანტების პროგრამის სამეთვალყურეო საბჭოს წევრებთან ერთად, ორგანიზაციების სამწლიანი მუშაობის შედეგებს გაეცნენ.
არასამთავრობო და სათემო ორგანიზაციების წამომადგენლებმა საქართველოს სხვადასხვა რეგიონში განხორციელებული პროექტების შედეგებზე, ასევე, გარემოსდაცვით გამოწვევებსა და სამომავლო საქმიანობაზე ისაუბრეს, რომელიც მოსახლეობისა და ადგილობრივი ხელისუფლების ჩართულობით განხორციელდება.
გლობალური გარემოსდაცვითი ფონდის (GEF) მცირე გრანტების პროგრამა 2012 წლიდან ხორციელდება, რომლის გაცემული გრანტების ოდენობამ 750 ათასი აშშ დოლარი შეადგინა, ხოლო არასამთავრობო და სათემო ორგანიზაციების მიერ მოზიდულმა თანადაფინანსებამ - 926 ათასი აშშ დოლარი. 2012 -2015 წლებში განხორციელებული პროექტები ეხებოდა ისეთ საკითხებს, როგორიცაა ბიომრავალფეროვნების კონსერვაცია, საერთაშორისო წყლები, მდგრადი ორგანული დამაბინძურებლები და კლიმატის ცვლილება.
წარმატებული პროექტების სიაშია კოლხური ხოხბის აღდგენა ვაშლოვანის დაცულ ტერიტორიებში, ქიმიური ნარჩენების მართვის თანამედროვე მეთოდების დანერგვა ხარაგაულში, დეგრადირებული ნიადაგის აღდგენა თუშეთსა და ჭიათურაში, მდინარეების ალაზნისა და ილტოს მიმდებარე სოფლების დაცვა წყალდიდობებისაგან.
გარემოსდაცვით მნიშვნელობასთან ერთად, პროექტებმა წვლილი შეიტანეს სიღარიბის დაძლევაში, ადგილობრივი მოსახლეობის ეკონომიკური და სოციალური პირობების გაუმჯობესებასა და გენდერული თანასწორობის საკითხებში.
გლობალური გარემოსდაცვითი ფონდის (GEF) მცირე გრანტების პროგრამის ახალი ფაზა 2018 წლის ბოლომდე გაგრძელდება.
