დღეს გავრცელებულ კადრებს ჩემში რაღაც განსაკუთრებული აღშფოთება არ გამოუწვევია, რადგან ჩემთვის ისედაც ცნობილი იყო, ქვეყანას როგორი მეთოდებით მართავდნენ, - განაცხადა გორის მაჟორიტარობის კანდიდატმა, ირაკლი ოქრუაშვილმა გადაცემა 2030-ში.
“ეს მასალა იმაზე მიუთითებს, რომ გუნდში, რომელიც მაშინ ქვეყანას მართავდა, აბსოლუტური დაუსჯელობის სინდრომი არსებობდა. აღშფოთებას მხოლოდ ერთი რამ იწვევს. რატომ ჩერდება გამოძიება მხოლოდ დათა ახალაიაზე, რომელიც არა გადაწყვეტილების მიმღები, არამედ შემსრულებელი იყო?! ასეთ დარღვევებზე გადაწყვეტილებას სააკაშვილი და მერაბიშვილი იღებდნენ. თუმცა, კანონმდებლობაში განხორციელებული ცვლილებებით ე.წ შეკრებითობის პრინციპი აღარ არის. ანუ, მაღალი სასჯელი დაბალს შთანთქავს და მერაბიშვილს რამდენიც არ უნდა მიუსაჯონ, მისჯილი სასჯელის ზემოთ ვეღარაფერს დაუმატებენ, - განაცხადა ოქრუაშვილმა.
მისი თქმით, მაღალჩინოსნებთან მიმართებაში გამოძიება შესაძლოა, უფრო ეფექტური ყოფილიყო, მაგრამ არსებობს გარკვეული კონიუნქტურა, რომელსაც ხელისუფლება ანგარიშს უწევს.
“მიმაჩნია, რომ შესაძლებელი იყო, მაღალჩინოსნებთან მიმართებაში გამოძიება უფრო ეფექტური ყოფილიყო, მაგრამ არსებობს გარკვეული კონიუნქტურა, რომელსაც შესაძლოა, გამომძიებელი და პროკურორი არა, მაგრამ ზოგადად ხელისუფლება ანგარიშს უწევს. ჩემი აზრით, ხელისუფლება ცდილობს, ეს ყველაფერი სამართლებრივ ჭრილში რაც შეიძლება ნაკლებად გადაიტანოს და უფრო მეტი პიარი იყოს. მიმაჩნია, რომ ამ ადამიანების დასჯა ხელისუფლებისთვის სწრაფად და უმტკივნეულოდ ამოსაღები კბილი იყო. ხელისუფლებამ ამ კბილის ამოღება ძალიან გააჭიანურა, რის გამოც დაზარალდა”, - განაცხადა ირაკლი ოქრუაშვილმა.
