15-16 სექტემბერს, საქართველოს პარლამენტის თავმჯდომარე, დავით უსუფაშვილი, სტრასბურგს ეწვევა, სადაც ევროპის საბჭოს წევრი და პარტნიორი ქვეყნების პარლამენტების თავმჯდომარეთა ევროპულ კონფერენციაში მიიღებს მონაწილეობას.
კონფერენციის ფარგლებში, დავით უსუფაშვილი შეხვედრებს ევროპის საბჭოს საპარლამენტო ასამბლეის პრეზიდენტთან, პედრო აგრამუნტთან და ევროპის საბჭოს გენერალურ მდივანთან, თორბიორნ იაგლანდთან გამართავს. ასევე, დაგეგმილია საქართველოს პარლამენტის თავმჯდომარის შეხვედრა ესტონეთის პარლამენტის (რიგიკოგუ) თავმჯდომარესთან, ეიკი ნესტორთან და შვედეთის პარლამენტის (რიკსტაგი) თავმჯდომარესთან, ურბან აჰლინთან.
ევროპის საბჭოს წევრი და პარტნიორი ქვეყნების პარლამენტების თავმჯდომარეების ევროპული კონფერენცია ორ წელიწადში ერთხელ იმართება და მასში 350-მდე დელეგატი იღებს მონაწილეობას. ღონისძიებაზე, რომელიც ევროპის საბჭოს საპარლამენტო ასამბლეის (PACE) მიერაა ორგანიზებული, ევროპის წინააღმდეგ არსებულ გამოწვევებსა და მათ წინააღმდეგ ბრძოლაში პარლამენტების როლზე იმსჯელებენ.
