საქართველოს ენერგეტიკის მინისტრმა, ვიცე-პრემიერმა კახა კალაძემ თანამდებობის დატოვების შესახებ ოფიციალურად განაცხადა.
კახი კალაძემ ენერგეტიკის თანამშრომლებს მადლობა გადაუხადა და აღნიშნა, რომ ამ ხნის განმავლობაში ბევრი მნიშვნელოვანი პროექტი განახორციელეს, 24 საათის განმავლობაში მუშაობდნენ.
„მე დღეიდან აღარ ვარ თქვენი მინისტრი, ჩვენ ვიქნებით ერთად, მთავარი ეს არის და ერთად მივაღწევთ გამარჯვებას. ცხოვრებაში ბევრი სახლი გამოვიცვალე, ენერგეტიკის სამინისტროც ჩემი სახლია", - აღნიშნა კალაძემ.
კახი კალაძე საპარლამენტო არჩევნებში მონაწილეობს და “ქართული ოცნების“ საარჩევნო სიის მეორე ნომერია.
კალაძის გარდა, სიაში კიდევ ერთი მინისტრია, სოფლის მეურნეობის მინისტრი ოთარ დანელია, რომელმაც უკვე დატოვა თანამდებობა.
კანონმდებლობის მიხედვით, მთავრობის წევრი ვალდებულია, საპარლამენტო არჩევნებში მონაწილეობის შემთხვევაში, თანამდებობა დატოვოს.
საქართველოს მთავრობის საპარლამენტო მდივანის შალვა თადუმაძის ინფორმაციით, კალაძისა და დანელიას შემცვლელები ორი კვირის ვადაში უნდა დაინიშნოს.
მისივე განმარტებით, ამ სამთავრობო ცვლილებების მიუხედავად, პარლამენტში მთავრობისთვის ნდობის ხელახლა გამოცხადების საჭიროება არ დგას.
