,,ნინო ბურჯანაძე - დემოკრატიულ მოძრაობას“ პარტიის გენერალური მდივანი ზაზა ვეკუა ტოვებს. ,,რუსთავი 2“ -ის ინფორმაციით, დემოკრატიული მოძრაობიდან ასევე მიდიან თბილისის საკრებულოს დეპუტატებიც.
ნინო ბურჯანაძის პარტიის უკვე ყოფილი გენერალური მდივანი პარტიის დატოვების ერთ-ერთ მთავარ მიზეზად ასახელებს იმ აზრთა სხვადასხვაობას, რომელიც პარტიის ხელმძღვანელობასთან პოლიტიკური გადაწყვეტილებების მიღებისას ჰქონდა.
გავრცელდა ინფორმაცია, რომ ზაზა ვეკუას აღნიშნული გადაწყვეტილება ე.წ. უბლოკო სტატუსს უკავშირდება.
„არსებობდა აზრთა სხვადასხვაობა პოლიტიკურ გადაწყვეტილებებთან მიმართებაში ჩემსა და თავმჯდომარეს შორის. ეს მიმაჩნდა მეტად მნიშვნელოვნად არა ჩემთვის, არამედ ქვეყნისთვისაც, ამიტომაც მივიღე გადაწყვეტილება, რომ დამეტოვებინა პარტია. ამაში ტრაგედიას ვერ ვხედავ ვერც ჩემი კუთხით, ვერც დემოკრატიული მოძრაობისთვის,“ - განაცხადა თბილისის საკრებულოს ფრაქცია გაერთიანებული დემოკრატიული მოძრაობის თავმჯდომარემ ზაზა ვეკუამ, რომელიც განმარტავს, რომ სხვა პარტიაში გადასვლის გეგმები არ აქვს.
